राजावादी प्रदर्शनमा पक्राउ परेका प्रसाईं, मिश्रसहित २२ जनालाई ३ दिनको म्याद थप

काठमाडौं । तीनकुनेमा भएको राजावादी प्रदर्शनमा पक्राउ परेका राप्रपा नेता रवीन्द्र मिश्र, सोही प्रदर्शनका कमाण्डर दुर्गा प्रसाईं लगायतलाई ३ दिनको म्याद थप भएको छ ।

जिल्ला प्रहरी परिसरका प्रहरी प्रवक्ता एसपी अपिलराज बोहराका अनुसार राज्यविरुद्धको कसुरमा अनुसन्धानमा रहेका २२ जनालाई नै अदालतबाट पुन: ३ दिनको म्याद थप भएको हो ।

दुर्गा प्रसाईंले आफू क्यान्सरको बिरामी र चिकित्सकको निगरानीमा औषधोपचार गराइरहेको भनेर र रवीन्द्र मिश्रले आवश्यक स्वास्थ्य जाँच र चिकित्सकको सिफारिस अनुसार उपचारको प्रबन्ध गराउनका लागि निवेदन दिएकाले काठमाडौं जिल्ला अदालतले उनीहरुको हकमा उपचारको उपयुक्त प्रबन्ध गराउन निर्देशन दिएको छ । सो अनुसार उनीहरुलाई हाजिरी जमानीमा छाड्ने वा तारेखमा राख्न सक्ने सम्बन्धमा अनुसन्धान अधिकारी र जिल्ला सरकारी वकिलको कार्यालयलाई जानकारी गराउन भनिएको छ ।

राजावादीहरुको हिंस्रक प्रदर्शनका क्रममा दुई जनाको मृत्यु भएको थियो । प्रहरीले आन्दोलनका कमाण्डर दुर्गा प्रसाईं, राप्रपाका वरिष्ठ उपाध्यक्ष मिश्रसहितका नेताहरु र अन्य गरी ८४ जनालाई थुनामा राखेर अनुसन्धान गरिरहेको छ ।