संसदमा वेल अगाडि पलेंटी कसेर बसे रास्वपा सांसदहरू, राप्रपाले गर्यो संसद् बहिष्कार

काठमाडौं । राष्ट्रिय स्वतन्त्र पार्टी (रास्वपा)को अवरोधबीच प्रतिनिधि सभा बैठक कार्यसूचीमा अघि बढिरहेको छ । सरकारले जेठ १५ गते ल्याएको बजेटमाथिको सामान्य छलफल संसदमा सुरू भएको हाे ।

प्रतिपक्षीको विरोधबीच बैठक कार्यसूचीमा प्रवेश गरेपछि राष्ट्रिय प्रजातन्त्र पार्टीका सांसदहरू भने बाहिरिएका छन् । रास्वपाले भने बैठक सुरू हुने बित्तिकै वेल घेरेर नाराबाजी गरेका थिए । सुरूमा उठेर नाराबाजी गरेका उनीहरू अहिले वेल अगाडि पलेंटी कसेर बसेरै नाराबाजी गरिरहेका छन् । भिजिट भिसा प्रकरणमा गृहमन्त्री रमेश लेखकको राजीनामा माग गर्दै उनीहरूले विरोध प्रदर्शन गरिरहेका हुन् । 

साथै राप्रपाले संसद् बहिष्कार गरेको छ । नियमाली अनुसार संसद् नचलेकाले बहिष्कार गरिएको प्रमुख सचेतक ज्ञानेन्द्र शाहीले बताए ।  प्रतिनिधिसभामा अहिले बजेटमाथिको छलफल चलिरहेको छ ।  बहिष्कारसँगै राप्रपाका सांसदहरु अहिले बाहिर निस्किएका छन् ।