राष्ट्रपतिलाई दबाब दिएर हटाउन खोजिँदैछ, अब केही दिन मात्रै हो भन्ने सुनेको छु : प्रचण्ड

विराटनगर, १२ असार ।
नेपाली कम्युनिस्ट पार्टी (नेकपा) का संयोजक एवं पूर्वप्रधानमन्त्री पुष्पकमल दाहाल 'प्रचण्ड' ले वर्तमान राष्ट्रिय स्वतन्त्र पार्टी (रास्वपा) नेतृत्वको सरकारले राष्ट्रपतिमाथि चरम दबाब सिर्जना गरिरहेको सनसनीपूर्ण दाबी गरेका छन्। उनले वर्तमान सत्तापक्षले राष्ट्रपतिलाई पदबाटै हटाउनेसम्मको खेल खेलिरहेको कुरा आफूले सुनेको खुलासा गरेका हुन्।

शुक्रबार विराटनगरमा आयोजित नेकपाको पार्टी एकता तथा अगुवा कार्यकर्ता प्रशिक्षण कार्यक्रमलाई सम्बोधन गर्दै संयोजक प्रचण्डले मुलुकको पछिल्लो राजनीतिक परिस्थितिबारे गम्भीर चिन्ता व्यक्त गरे।

'राष्ट्रपति टिक्दैनन्, केही दिन मात्रै हो'
सम्बोधनका क्रममा प्रचण्डले संविधान विरोधी तत्वहरूले शीतल निवासमाथि जबरजस्ती दबाब बढाएको उल्लेख गरे। उनले भने, “संविधान खारेज गर्न राष्ट्रपतिमाथि जबरजस्ती दबाब भइरहेको कुरा सुन्नमा आएको छ। कोही-कोहीले त मलाई भन्दैछन्– अब राष्ट्रपति धेरै दिन टिक्दैनन्, केही दिन मात्रै हो। उहाँलाई पद छोड्नका लागि जबरजस्ती दबाब दिइँदैछ।” उनले वर्तमान सरकार व्यवस्था र संविधान उल्ट्याउने शृङ्खलाअन्तर्गत नै राष्ट्रपतिमाथि खनिएको आरोप लगाए।

संघीयता र समावेशीतामाथि खुलेआम प्रहार
प्रचण्डले रास्वपाको हालै सम्पन्न महाधिवेशनप्रति लक्षित गर्दै सत्तासीन दलहरूले नै गणतन्त्र र सङ्घीयताको जग हल्लाउन खोजेको बताए। “अहिले महाधिवेशनका नाममा उनीहरूले सङ्घीयताका विरुद्ध, प्रदेश सभाका विरुद्ध र समावेशी समानुपातिकता विरुद्ध खुलेआम प्रहार सुरु गरेका छन्,” प्रचण्डले थपे। वर्तमान सरकारका नीति, बजेट र निर्णयहरू गरिब, मजदुर र उत्पीडित समुदायको हितविपरीत रहेको भन्दै उनले अब संसद् र सडक दुवै मोर्चाबाट प्रतिवाद गर्ने चेतावनी दिए।

एमालेसँग तत्काल सहकार्य हुने र अर्को 'क्रमभङ्ग' को सङ्केत
राजनीतिक वृत्तमा तरङ्ग ल्याउँदै प्रचण्डले नेकपा एमालेसँग आवश्यकताअनुसार तत्कालै सहकार्य र कार्यगत एकताको प्रक्रिया अगाडि बढ्ने घोषणा गरे। वामपन्थी शक्तिहरूबीच ध्रुवीकरण र एकता आजको आवश्यकता रहेको बताउँदै उनले कार्यकर्ताहरूलाई उच्च मनोबलका साथ तयारी अवस्थामा रहन निर्देशन दिए।

आफ्नो राजनीतिक जीवन सधैँ 'टर्निङ प्वाइन्ट' र उथलपुथलमा बित्ने गरेको स्मरण गर्दै प्रचण्डले आगामी महाधिवेशनबाट देशको राजनीतिमा अर्को ठूलो परिवर्तन अर्थात् 'अन्तिम क्रमभङ्ग' हुने दाबी गरे। उनले कार्यकर्ताहरूलाई ढाडस दिँदै भने, “नेतृत्वले छोड्दैन कि भन्ने चिन्ता नलिनुस्, अघि बढ्नुस्। अब प्रचण्डको अन्तिम फेरबदल र राजनीतिक तरङ्ग कस्तो हुन्छ, त्यो हेर्न बाँकी नै छ।”

विराटनगरको सोही कार्यक्रममा नेकपाका सह-संयोजक माधव कुमार नेपालको रुस भ्रमण र आफ्नो आगामी श्रीलङ्का भ्रमणबारे जानकारी दिँदै प्रचण्डले पार्टीले अन्तर्राष्ट्रिय सम्बन्धलाई समेत मजबुत बनाउँदै लगेको बताए। राजनीतिक रूपमा यो गम्भीर मोडमा प्रचण्डले राष्ट्रपतिमाथि दबाब रहेको भनी दिएको अभिव्यक्तिलाई लिएर राष्ट्रिय राजनीतिमा नयाँ बहस र तरङ्ग सुरु भएको छ।