एयर इन्डिया विमान दुर्घटना- क्याप्टेनले इन्धन आपूर्ति बन्द गरेको दाबि !

काठमाडौँ । गत जुन १२ मा अहमदाबादमा दुर्घटनाग्रस्त एयर इन्डियाको विमानका दुई पाइलटहरू बीचको अन्तिम कुराकानीको सम्बन्धमा एउटा नयाँ दाबी बाहिर आएको छ । अमेरिकी अखबार वाल स्ट्रिट जर्नलले विमानका क्याप्टेन सुमित सभरवालले इन्जिनमा इन्धन आपूर्ति बन्द गरेको रिपोर्ट गरेको छ ।

जर्नलले दुई पाइलटहरू बीचको कुराकानीको ककपिट रेकर्डिङबाट यो खुलासा भएको उल्लेख गरेको छ । आवाज रेकर्डिङमा बोइङ विमान उडाइरहेका सह-पाइलट क्लाइभ कुन्दरले क्याप्टेन सुमित सभरवाललाई सोधेका थिए- 'तपाईंले इन्धन स्विचलाई 'कट अफ' किन गर्नु भयो ? '

रिपोर्टमा भनिएको छ- प्रश्न सोध्दा सह-पाइलट छक्क परेका थिए । उनको आवाजमा त्रास थियो, जबकि क्याप्टेन सुमित शान्त देखिन्थे । क्याप्टेन सुमित सभरवाल एयर इन्डियाको विमानका वरिष्ठ पाइलट थिए । उनीसँग १५,६३८ घण्टा उडान अनुभव थियो र सह-पाइलट क्लाइभ कुन्दरसँग ३,४०३ घण्टा उडान अनुभव थियो ।

आफ्नो रिपोर्टमा, वाल स्ट्रिट जर्नलले विमान दुर्घटनाको अनुसन्धान गरिरहेका अमेरिकी अधिकारीहरूको प्रारम्भिक अनुसन्धानसँग परिचित व्यक्तिहरूलाई उद्धृत गरेको छ । यस रिपोर्टमा भारतको विमान दुर्घटना अनुसन्धान ब्यूरो, नागरिक उड्डयन महानिर्देशनालय, नागरिक उड्डयन मन्त्रालय, बोइङ वा एयर इन्डियाबाट कुनै प्रतिक्रिया आएको छैन ।

यसअघि, विमान दुर्घटना अनुसन्धान ब्यूरोले जुलाई १२ मा विमान दुर्घटनाको बारेमा आफ्नो प्रारम्भिक अनुसन्धान प्रतिवेदन जारी गरेको थियो । इन्धन स्विचहरू अचानक 'रन' बाट 'कटअफ' स्थितिमा सरेको बताइएको थियो, जसका कारण दुवै इन्जिनहरू बन्द भएका थिए ।

यद्यपि, रिपोर्टले इन्धन स्विचहरू कसरी बन्द गरियो भनेर बताएको छैन । ब्यूरोले भनेको थियो- 'ककपिट भ्वाइस रेकर्डरमा, एक पाइलटले अर्कोलाई इन्धन किन बन्द गर्यो भनेर सोधेको सुनिएको थियो । अर्को पाइलटले जवाफ दिए कि उनले त्यसो गरेनन् ।'

यसैबीच एयर इन्डियाले आफ्ना सबै बोइङ-७८७ सिरिजका विमानहरूको इन्धन नियन्त्रण स्विचको लकिङ सुविधाको अनुसन्धान पूरा भएको जानकारी दिएको छ । आफ्ना पाइलटहरूलाई पठाइएको सन्देशमा, एयरलाइन कम्पनीले अनुसन्धानको क्रममा इन्धन स्विचमा कुनै गल्ती फेला नपरेको बताएको छ ।

कम्पनीले सबै बोइङ-७८७ विमानहरूमा थ्रोटल नियन्त्रण मोड्युल पनि बदलिएको छ । इन्धन नियन्त्रण स्विचको एक महत्त्वपूर्ण भाग हो । जुलाई १४ मा, नागरिक उड्डयन महानिर्देशनालयले सबै एयरलाइन्सलाई जुलाई २१ सम्ममा सबै बोइङ-७३७ र ७८७ सिरिजका विमानहरूमा इन्धन स्विच जाँच गर्न निर्देशन दिएको थियो । एयर इन्डियासँग जम्मा ३३ वटा बोइङ-७८७ ड्रीमलाइनर विमान छन् ।