अभिनेता सैफ अली खानमाथि ज्यान लिनेगरी चक्कु आक्रमण, सैफको घाँटी र स्पाइनल कर्डमा गम्भीर चोट

काठमाडौं । बलिउड अभिनेता सैफ अली खानमाथि चक्कु आक्रमण भएको छ । रातको साढे दुई बजे एक व्यक्तिले अभिनेतामाथि चक्कु प्रहार गरेका हुन् । मुम्बईको बान्द्रास्थित उनको घरमा बिहान २.३० बजे अज्ञात व्यक्ति चोरीको नियतले प्रवेश गरेको थियो । आक्रमणकारीसँग झडपका क्रममा उनीमाथि धारिलो हतियारले पटकपटक प्रहार भएको थियो ।

सैफ अली खान मुम्बईको लीलावती अस्पतालमा छन्, जहाँ उनको शल्यक्रिया भइरहेको छ । उनको शरीरमा ६ ठाउँमा छुरा प्रहार भएको स्रोतले जनाएको छ । सैफको घाँटी र स्पाइनल कर्डमा गम्भीर चोट लागेको छ । सैफको न्यूरो सर्जरी भएको छ । उनको शरीरबाट दुईदेखि तीन इन्च लामो धारिलो वस्तु निकालिएको छ । यो चक्कु को एक भाग भएको मानिएको छ । अहिले सैफ अली खानको कस्मेटिक सर्जरी भइरहेको छ ।

यस हमलामा सैफ अली खानको घरका सहयोगी पनि घाइते भएका छन् । घरेलु कामदारलाई सामान्य चोट लागेको छ । स्रोतका अनुसार घरमुनि एउटा नाली थियो, जुन सुत्ने कोठाभित्र खुल्थ्यो । प्रारम्भिक अनुसन्धानमा चोरहरु यही नालीबाट घर भित्र पसेको हुन सक्ने देखिएको छ ।

लीलावती अस्पतालका सीओओ डाक्टर नीरज उत्तमानीले मध्यरातमा सेफ अली खानलाई बान्द्रास्थित उनको घरमा अज्ञात व्यक्तिले आक्रमण गरेको बताए । सैफलाई ६ पटक छुरा प्रहार गरिएको थियो जसमध्ये २ वटा घाउ निकै गहिरो थिए । यीमध्ये एउटा प्रहार सैफको स्पाइनल कर्डमा भएको थियो । न्यूरोसर्जन डा नितिन डांगे र कस्मेटिक सर्जन डा लीना जैनको नेतृत्वमा चिकित्सकको टोलीले उनको शल्यक्रिया गरिरहेको छ ।

स्रोतका अनुसार यो घटना सैफ अली खानका छोराछोरी तैमुर र जेहको कोठामा भएको हो । प्रहरीले आक्रमणकारी कसरी भित्र पसे भन्ने खोजी भइरहेको छ । आक्रमणकारी बाहिरबाट आएका थिए वा भित्रैबाट आएका थिए भन्ने प्रहरीले खोजी गरिरहेको छ ।

सैफको पीआरका अनुसार न्यानी (बाल हेरचाह सहयोगी) राती २.३० बजे केही आवाज सुनेर ब्युझिएकी थिइन् । सैफ अलीको सम्पूर्ण परिवार घरमा सुतिरहेको थियो । आवाज सुनेपछि सैफ अली खान ब्युँझिए र आक्रमणकारीको सामना गरे । सैफले आक्रमणकारीलाई समात्ने प्रयास गरे। यस झडपमा आक्रमणकारीले उनीमाथि पटकपटक आक्रमण गरेपछि आक्रमणकारीहरु भागेका थिए ।

सैफकी पत्नी करीना कपुरको टोलीले एक विज्ञप्ति जारी गर्दै घरमा लुट्ने प्रयास भएको बताएको छ । सैफ घाइते भएर अस्पतालमा भर्ना भएका छन् । बाँकी परिवार पूर्णरुपमा सकुशल छन् । विज्ञप्तिमा भनिएको छ ‘हामी मिडिया र फ्यानहरूलाई धैर्य गर्न र कुनै पनि प्रकारको अनुमान नगर्न अनुरोध गर्दछौं। प्रहरीले यस विषयमा अनुसन्धान गरिरहेको छ ।’

सैफकी बच्चालाई स्यहारसुसार गर्ने कामदार राती साढे दुई बजे कुनै आवाज सुनेर उठेकी थिइन् । त्यसबेला घरमा सैफ अली खानका सम्पूर्ण परिवार सुतिरहेका थिए । हल्ला सुनेर सैफ उठे । आक्रमणकारी र उनी आमनेसामने भए । सैफले आक्रमणकारीलाई पक्रने प्रयास गरिरहँदा उनले सैफमाथि चक्कु प्रहार गरेका थिए ।