अन्तर्राष्ट्रिय खेलको अधिकार हस्तान्तरण र टिकट बिक्रीमा अनियमितता: एन्फाका अध्यक्ष र महासचिवविरुद्ध पक्राउ पुर्जी, दुई पदाधिकारी धरौटीमा रिहा

ई संचार पाटी
काठमाडौँ, २३ असोज । अखिल नेपाल फुटबल संघ (एन्फा) मा भएको खेल मिलेमतो (म्याच फिक्सिङ), आर्थिक अनियमितता तथा ठगी प्रकरणमा नयाँ र शक्तिशाली प्रशासनिक मोड आएकाे छ। ललितपुर जिल्ला अदालतले एन्फाका अध्यक्ष पंकजविक्रम नेम्वाङ र महासचिव किरण राईलाई तत्काल पक्राउ गरी बुझाउन प्रहरीलाई आदेश दिएको छ। 

जिल्ला न्यायाधीश भगवती शर्मा ढुंगानाको इजलासले फरार सूचीमा रहेका अध्यक्ष नेम्वाङ र महासचिव राईविरुद्ध पक्राउ पुर्जी (अरेस्ट वारेन्ट) जारी गर्न आदेश दिएको अदालतका सूचना अधिकारी टीकाध्वज कार्कीले पुष्टि गरेका छन्। 

अध्यक्ष र महासचिव फरार, ९३ लाखभन्दा बढीको बिगो मागदाबी

नेपाल प्रहरीको केन्द्रीय अनुसन्धान ब्युरो (सीआईबी) ले गरेको विस्तृत छानबिन र प्रमाण संकलनका आधारमा जिल्ला सरकारी वकिल कार्यालय ललितपुरले बिहीबार मात्रै अदालतमा मुद्दा दर्ता गरेको थियो। अभियोगपत्र दायर हुँदाको बखतदेखि नै अध्यक्ष नेम्वाङ र महासचिव राई फरार रहेको जनाइएको छ। 

सरकारी वकिल कार्यालयले उनीहरूमाथि राष्ट्रिय खेलकुद विकास ऐन, २०७७ को दफा ३१ बमोजिमको खेलमा मिलेमतो र अनियमितता गरेको तथा मुलुकी अपराध संहिता, २०७४ को दफा २४९ बमोजिम ठगीको कसुर गरेको दाबीसहित मुद्दा चलाएको हो। प्रतिवादीहरूबाट कुल ९३ लाख ९०० रुपैयाँ बराबरको बिगो तथा क्षतिपूर्ति असुल गर्न मागदाबी गरिएको छ। 

किन भयो मुद्दा दर्ता?

सीआईबीको अनुसन्धान प्रतिवेदन अनुसार, सन् २०२४ मा नेपाल र बहराइनबीचको अन्तर्राष्ट्रिय फुटबल खेलको अधिकार हस्तान्तरण गर्दा राष्ट्रिय स्वार्थ विपरीत कार्य गरेको, एन्फाको आन्तरिक खरिद प्रक्रियामा बोलपत्र (टेन्डर) आह्वान नगरी एउटै स्वामित्व भएका फर्जी कम्पनीहरूबाट मोटो रकमकाे सामान कोटेशनमार्फत खरिद गरेको भेटिएको थियो। यसका साथै फिफा (FIFA) विश्वकप छनोट खेलका क्रममा प्राप्त भएका ३३० वटा अनलाइन टिकटहरू जिल्ला तथा क्लबहरूलाई वितरण नगरी व्यापक आर्थिक अपचलन गरेको तथ्य खुलेपछि सरकारी निकायले यो कदम चालेको हो। 

पक्राउ पुर्जी जारी भएको सोही इजलासले यसअघि नै सीआईबीको हिरासतमा रहेका एन्फाका दुई उच्च अधिकारीहरूलाई भने धरौटीमा रिहा गर्न आदेश दिएको छ। अदालतको आदेश अनुसार: 

• कोषाध्यक्ष रवीन्द्र जोशी: १५ लाख रुपैयाँ नगद धरौटी बुझाएर थुनामुक्त भएका छन्।
• लेखा अधिकृत सञ्जीव पाण्डे: १२ लाख रुपैयाँ नगद धरौटी बुझाएर थुनामुक्त भएका छन्। [

जोशी र पाण्डेलाई सीआईबीले केही दिनअघि एन्फा मुख्यालयमा छापा मारी नियन्त्रणमा लिएको थियो। दुवै जनाले धरौटी रकम बैंकमा जम्मा गरिसकेकाले अब मुद्दाको अन्तिम किनारा नलागेसम्म बाहिरै बसेर पुर्पक्ष गर्न पाउनेछन्। 

नेपाली फुटबलको इतिहासमै सर्वोच्च नेतृत्व तह (अध्यक्ष र महासचिव) नै म्याच फिक्सिङ र गम्भीर आर्थिक हिनामिनाको अभियोगमा फरार भएर पक्राउ पुर्जी जारी भएको यो पहिलो घटना हो। यस अदालती आदेशसँगै एन्फाको कार्यसमिति भङ्ग हुने र नेपाली फुटबलमा अन्तर्राष्ट्रिय निकाय (फिफा) को प्रतिबन्ध लाग्न सक्नेसम्मको जोखिम बढेको खेलकुद विश्लेषकहरूले बताएका छन्।