माओवादीमा ९७ केन्द्रीय सदस्य थप,प्रचण्डका छोरी र ज्वाईं नै बने केन्द्रीय सदस्य, स्थानीय चुनावपछि एमसीसीमा छलफल

नेकपा माओवादी केन्द्रले ९७ जना केन्द्रीय सदस्य थपेको छ।केही जिल्ला र प्रदेशबाट सिफारिस कलस्टरसहित समेटेर अध्यक्ष पुष्पकमल दाहाल ‘प्रचण्ड’ले ९७ जना केन्द्रीय सदस्य थपेका हुन्।

प्रचण्डका छोरी र ज्वाई नै पार्टी केन्द्रीय कमिटी सदस्य बनेका छन् । अध्यक्ष प्रचण्डले सोमबारको केन्द्रीय समिति बैठकमा केन्द्रीय समितिलाई पूर्णता दिने क्रममा कान्छी छोरी गंगा र उनका श्रीमान जीवन आचार्यलाई केन्द्रीय सदस्य घोषणा गरेका हुन् । आचार्य प्रदेश १ को खसआर्य पुरुष युवाबाट र गंगा वागमती प्रदेशबाट खसआर्य महिलाबाट केन्द्रीय सदस्य बनेकी हुन् ।

शुक्रबारदेखि जारी केन्द्रीय समितिले अध्यक्ष दाहालले थपेका ९७ जनाको नाम पारित गरेको छ। अध्यक्ष दाहालले खुलातर्फ ५५ तथा समानुपातिक तर्फ ४२ जनाको नाम पेस गरेका थिए। यससँगै माओवादी केन्द्रीय समिति ३४३ सदस्यीय बनेको छ। यसअघि पुसमा सम्पन्न आठौं महाधिवेशनले २४६ केन्द्रीय सदस्य चयन गरेको थियो।

‘केन्द्रीय समितिको थप ९७ जना थपिएको छ। केही मनोनीत र केही जिल्ला र प्रदेशहरुले कलस्टरहरुबाट थप्नुपर्ने थियो। त्यो सबै गरेर ९७ जना थप गरिएको छ,’ केन्द्रीय सदस्य राजु खड्काले भने ।उनकाअनुसार केन्द्रीय समितिले एमसीसीको विषय टुंगो लगाएको छ। ‘एमसीसीमा जे जति भएको छ त्यसलाई यथावत राख्दै नोट अफ डिसेन्ट र अध्यक्षले गरेको प्रस्तावलाई यथावत राखेर स्थानीय चुनाव सकिने वित्तिकै छलफल गर्ने भनेर केन्द्रीय कमिटीले एमसीसीको विषयमा टुंगो लगाएको छ,’

उनले भने।अहिले पार्टीभित्र देखिएका अन्तरविरोधलाई एकठाउँमा राखेर तलदेखि माथिसम्म सिंगो केन्द्रीय समितिलाई कार्यविभाजन गरेर चुनावी अभियानमा लैजाने निष्कर्ष पनि केन्द्रीय समितिले निकालेको छ।नेता वर्षमान पुनले स्थायी समिति र पोलिटब्यूरो तथा पदाधिकारी चुनावपछि टुंगो लाग्ने बताए।