प्रमुख प्रशासकीय अधिकृतलाई रोक्न महानगर प्रहरी परिचालन, कार्यालय परिसरमा तनावको स्थिति सृजना

काठमाडौं । काठमाडौं महानगरपालिकाका प्रमुख प्रशासकीय अधिकृत सरोज गुरागाईंलाई रोक्न महानगर प्रहरी परिचालन गरिएको छ । नगरपालिकाका कर्मचारीहरु भने प्रमुख प्रशासकीय अधिकृत गुरागाईलाई स्वागत गर्न गेटमा जम्मा भएपछि महानगरको नेतृत्व र कर्मचारीबीच टकरावको स्थिति देखिएको छ । वडाध्यक्षहरु समेत कर्मचारीहरुसँगै गुरागाईलाई स्वागत गर्न गेटमा बसेका छन् ।

५ महिनादेखि तलब नपाएको र काम रोकिएको भन्दै महानगरका कर्मचारीले नै प्रमुख प्रशासकीय अधिकृत गुरागाईलाई हाजिर गराउने तयारी गरेका थिए । तर, मेयरले उनलाई रोक्न नगर प्रहरी परिचालन गरेपछि महानगरको कार्यालय परिसरमा तनावको स्थिति सृजना भएको छ ।

काठमाडौंको पुरानो बसपार्क क्षेत्रमा निर्माणाधीन काठमाडौं टावरको नक्सा पास गर्दा अनियमितता गरेको आरोप लगाउँदै मेयरले अधिकृत गुरागाईलाई कारवाही सिफारिस गरेका थिए । तर, उनीमाथिको आरोप पु्ष्टि नभएको भन्दै संघीय सरकारको सामान्य प्रशासन मन्त्रालयले उनैलाई निरन्तरता दिन भनेपछि बालेन उनलाई कार्यालयमा निरन्तरता दिन तयार नभएका हुन् ।