देशको भविष्य बदल्ने क्रान्तिका लागि म थप त्याग र कठोर भन्दा कठोर तपस्याका लागि तयार छु- सभापति रवि लामिछाने

काठमाडौँ । राष्ट्रिय स्वतन्त्र पार्टी रास्वपाका सभापति रवि लामिछानेले निर्वाचनबाट आउने जनमत स्वीकार्ने स्पष्ट पारेका छन् । तर, षड्यन्त्रपूर्ण ढंगले पुरानो संसद् पुनःस्थापना गर्ने कुनै पनि प्रयास आफूहरूले स्वीकार नगर्ने चेतावनी दिएका छन् ।

सामाजिक सञ्जालमार्फत सन्देश जारी गर्दै लामिछानेले देश निर्णायक मोडमा पुगेको उल्लेख गरेका छन् । उनले देश ‘अन्तिम सुनामीको तयारीमा’ रहेको टिप्पणी गर्दै पुराना राजनीतिक शक्तिलाई खुलेआम वा गोप्य रूपमा गठबन्धन गरेर देखाउन चुनौती दिएका छन् । साथै उनलेराष्ट्रिय स्वतन्त्र पार्टीका सभापति रवि लामिछानेले देशको भविष्य बदल्ने क्रान्तिका लागि आफू थप त्याग र कठोर तपस्याका लागि तयार भएको बताएका छन्।

मंगलबार सामाजिक सञ्जालमा लेख्दै उनले देशका सन्ततिको सुनौलो भाग्य मेट्ने र भाग्य लेखिएको त्यहि निधारमा ताकेर गोली ठोक्नेहरु विरुद्ध क्रान्तिको घण्टी बजिसकेको बताउँदै अब अन्तिम पर्दा उठ्न बाँकी रहेको बताए।

उनले लेखेका छन्,‘म कहाँ छु र मेरो के हुन्छ भनेर इतिहासको बेग रोक्ने हक हामी कसैलाई छैन। यो देशको भविष्य बदल्ने क्रान्तिका लागि म थप त्याग र कठोर भन्दा कठोर तपस्याका लागि विल्कुल तयार छु। मेरो नाम इतिहासको कुन पानामा लेखिन्छ वा मेटिन्छ मलाई त्यसको परवाह छैन। तर यस देशका सन्ततिको सुनौलो भाग्य मेट्ने र भाग्य लेखिएको त्यहि निधारमा ताकेर गोली ठोक्नेहरु विरुद्ध क्रान्तिको घण्टी बजिसकेको छ, अब अन्तिम पर्दा उठ्न बाँकी छ, त्यो पर्दा हामी मिलेर उठाउनेछौं।’

त्यस्तै उनले भ्रष्टतन्त्रको ठेकेदार बनेर आफूहरुलाई लोकप्रियतावादी,भिजन बिनाका, निती सिद्धान्त बिनाका भनेर टिप्पणी गरिरहेको बताए । सबैभन्दा स्पष्टसँग लेखिएका रास्वपा-दस्तावेज पढ्ने जाँगर विश्लेषणजीविहरुलाई नचल्नुको भारी हामीले कहिलेसम्म बोक्ने? भन्दै उनले प्रश्न समेत गरेका छन्।

‘भ्रष्टतन्त्रको ठेकेदार बनेर हामीलाई लोकप्रियतावादी,भिजन बिनाका, निती सिद्धान्त बिनाका भनेर कसैले रोइकराइ गर्न पर्दैन । सबैभन्दा स्पष्टसँग लेखिएका रास्वपा–दस्तावेज पढ्ने जाँगर विश्लेषणजीविहरुलाई नचल्नुको भारी हामीले कहिलेसम्म बोक्ने? विचार सिद्धान्त,नीति सबै भएका भनिएका तपाइहरुको नियत,कार्यक्षमता सब देखियो, भो अब थप नदेखाउनुस् , नपढाउनुस् । देश रसातलमा पुग्दापनि भट्याएर नसकिएका तपाईंका विचारहरू तपाईँहरूलाई नै मुबारक। भारी भरकम शब्दहरू प्रयोग गरेर राजनीतिलाई कम्प्लिकेटेड बनाउनै पर्दैन, प्राप्त उपलब्धि सहितको लोकतन्त्र हामी जोगाउछौं, नसके जनता छन्’उनले लेखेका छन् ।

सभापति लामिछानेले गिद्धले सिनो लुछेजस्तै लुछिएको यो देश अन्तिम सुनामीको तयारीमा रहेको बताउँदै उनले भनेका छन्,‘अन्तिम शक्ति लगाऊ र यो सुनामी रोकेर देखाऊ, हामी मत परिणाम स्वीकार्छौं तर जन विद्रोहले उखेलेर फालेको पुरानो संसद, षडयन्त्रपुर्ण ढंगले फर्काउने कुनै पनि चलखेल,दवाब र धम्की स्वीकार्दैनौं ।फागुन २१ कुनै सामान्य मिति होइन, नेपाली इतिहासको माइलस्टोन हुनेछ। फागुन २१ पछि आउने संसदमा प्रतिपक्षी समेत नयाँ हुनु पर्छ । सर्प त एउटा पनि पाल्न सकिँदैन।’

उनले आफ्नो स्वास्थ्य अवस्था सामान्य भई आजबाट सार्वजनीक जीवनमा फर्किएको जानकारी पनि गराएका छन् ।