राष्ट्रिय फुटबल टिमले पायो नयाँ प्रशिक्षक

काठमाडौं । अखिल नेपाल फुटबल संघ (एन्फा) ले नेपाली राष्ट्रिय टिमको प्रशिक्षकमा मंगलबार प्रवेश कटुवाललाई नियुक्त गरेको छ । एन्फाका अध्यक्ष पंकज नेम्वाङले उनलाई नियुक्ति पत्र दिएका हुन् । पाकिस्तानविरुद्ध हुन लागेको एक अन्तर्राष्ट्रिय मैत्रीपूर्ण फुटबलका लागि एन्फाले उनलाई नियुक्त गरेको हो ।

कटुवालको नेतृत्वमा मछिन्द्रले दुई पटक सहिद स्मारक लिग ‘ए’ डिभिजनको उपाधि जितेको छ । आफ्नो खेल जीवनमा कुनै पनि समय राष्ट्रिय टिममा नपरेका कटुवालले प्रशिक्षकका रूपमा भने ऐतिहासिक जिम्मेवारी पाउन लागेका हुन् । नेपालले पाकिस्तानविरुद्ध दशरथ रंगशालामा कार्तिक ३० मा खेल खेल्दैछ ।

अन्तर्राष्ट्रिय फुटबल महासंघ फिफाको निलम्बन फुकुवा भएपछि पाकिस्तान अन्तर्राष्ट्रिय फुटबलमा फर्कन लागेको हो । निलम्बन फुकुवायता नेपालविरुद्धको खेल नै पहिलो अन्तर्राष्ट्रिय प्रतिस्पर्धा हुनेछ । पाकिस्तानले दुई खेलका लागि प्रस्ताव राखे पनि चुनावका कारण देखाएर एन्फाले एकै खेल मात्र खेल्ने निर्णय गरेको थियो ।