ग्रुप–२ खुल्ला दक्षिण अफ्रिका शीर्षमा

पर्थ । ट्वान्टी ट्वान्टी विश्वकप २०२२ मा आइतबार ग्रुप–२ का तीन खेल खेले र यसका नतिजाले समूहबाट सेमिफाइनल पुग्ने समीकरण खुल्ला रहेको छ । समूहका सबै टिमले तीन तीन खेल खेलेका छन् । दिनको अन्तिम तथा महत्त्वपूर्ण खेलमा दक्षिण अफ्रिकाले भारतलाई पाँच विकेटले हरायो र समूहको शीर्ष स्थानमा उक्लिन सफल रह्यो ।

भारतले जितका लागि १ सय ३४ रनको लक्ष्य दिएकोमा दक्षिण अफ्रिकाले त्यसलाई पाँच विकेट गुमाएर दुई बलको खेल बाँकी छँदा पूरा गर्‍यो । दक्षिण अफ्रिकालाई जित दिलाउन डेविड मिलरले ५९ र एडेन मारक्रमले ५२ रन बनाए । यस जितपछि दक्षिण अफ्रिकाको पाँच अंक भएको छ भने भारत चार अंकमा दोस्रो स्थानमा छ ।

त्यसपछि बंगलादेश चार अंकमा तेस्रोमा छ र उसले दिनको पहिलो खेलमा जिम्बावेलाई तीन रनले पराजित गर्‍यो । बंगलादेशले दिएको १ सउय ५१ रनको लक्ष्य अगाडि जिम्बावेले आठ विकेटमा १ सय ४७ रन मात्र बनाउन सक्यो । पाकिस्तानले भने पहिलो जितका लागि अर्को खेलमा नेदरल्यान्ड्सलाई छ विकेटले हरायो । जिम्बावेको तीन र पाकिस्तानको दुई अंक रहेको छ ।