एनपीएलमा आज दुई महत्त्वपूर्ण भिडन्त: विराटनगर–पोखरा र कर्णाली–लुम्बिनी आमनेसामने हुँदै

काठमाडौँ। तेस्रो संस्करणको नेपाल प्रिमियर लिग (एनपीएल) क्रिकेट प्रतियोगितामा आज बिहीबार लिग चरणका दुई रोमाञ्चक प्रतिस्पर्धा हुँदैछन्। कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने दुवै खेलको नतिजाले प्लेअफ (शीर्ष चार) मा पुग्ने टोलीहरूको गणितीय समीकरणमा ठुलो फेरबदल ल्याउने देखिन्छ ।

पहिलो खेल: विराटनगर किङ्स विरुद्ध पोखरा एभेन्जर्स (दिउँसो १२:३० बजे)

आजको पहिलो खेलमा दिउँसो साढे १२ बजे छैटौँ स्थानमा रहेको विराटनगर किङ्स र अङ्कतालिकाको पुछारमा रहेको पोखरा एभेन्जर्स बीच प्रतिस्पर्धा हुनेछ ।

जारी प्रतियोगितामा ५ खेल खेलेको विराटनगरले २ मा जित र ३ मा हार बेहोर्दै ४ अङ्क जोडेको छ। प्लेअफको सम्भावना बलियो बनाउन विराटनगरलाई आजको खेल जित्नैपर्ने दबाब छ। अर्कोतर्फ, समान ५ खेल खेलेको पोखरा १ जित र ४ हारसहित २ अङ्कका साथ तालिकाको अन्तिम (आठौँ) स्थानमा छ । पोखरालाई प्रतियोगितामा आफ्नो झिनो गणितीय आशा जीवित राख्न आज जितबाहेकको विकल्प छैन।

दोस्रो खेल: कर्णाली याक्स विरुद्ध लुम्बिनी लायन्स (अपराह्न ४:३० / ५:०० बजे)

त्यसैगरी, आजै हुने दिनको दोस्रो तथा फ्लडलाइट म्याचमा सातौँ स्थानको कर्णाली याक्स र तेस्रो स्थानको लुम्बिनी लायन्स बीच भिडन्त हुनेछ।

जारी लिगमा उच्च लयमा देखिएको लुम्बिनी ५ खेलबाट ३ जित, १ हार र एक खेल वर्षाले रद्द हुँदा अङ्क बाँड्दै ७ अङ्कका साथ तालिकाको तेस्रो स्थानमा मजबुत छ । आजको खेल जितेमा लुम्बिनी ९ अङ्क सहित प्लेअफमा आफ्नो स्थान लगभग पक्का गर्नेछ। यता, ५ खेलमध्ये २ जित र ३ हार बेहोरेको कर्णाली ४ अङ्कसहित सातौँ स्थानमा छ । लगातार तीन खेलमा पराजय भोगेको कर्णालीलाई प्लेअफको दौडमा कायमै रहन आज बलियाे प्रतिद्वन्द्वी लुम्बिनीलाई पराजित गर्नैपर्ने चुनौती छ ।