मुक्तक

१ 
न मान्छे भेटियो न त्यो समय मिल्यो
सुख शान्ति भन्दा मनमा भय मिल्यो
तड्पाउनेहरु पनि लामबद्ध छन यहाँ 
मिठो स्वरमा हुँकारको लय मिल्यो।
२
नसक्ने देख्दादेख्दै भारी बिसाउँदा रहेछन
हाँसीहाँसी बोलीमा बिष मिसाउँदा रहेछन
अब त को पराई को आफन्त छुट्याउन गाह्रो 
श्रद्धाञ्जलीमा पनि स्वार्थ मिसाउँदा रहेछन।
३
सजाएकै छु मुटुमा धड्कन बनाएर
भए भरको माया उहि माथी खनाएर
रमाउन पनि जानेको छु पसिना बगाई
हर- पिडालाई महोत्सव झैँ मनाएर।
४
साथ देउ एक्लो म पार्दिन कहिल्यै 
यो मुटुबाट अन्त सार्दिन कहिल्यै 
तिम्रो र मेरो प्रेमको विशाल युद्धमा 
सक्छु म अब जित्न हार्दिन कहिल्यै।

               पनौती-३,काभ्रे