एमाले बैठकको ऐतिहासिक निर्णय: ७ नेता स्थायी कमिटीमा समेटिए, विद्या भण्डारीलाई वरिष्ठ नेता बनाएर ओलीको नयाँ रणनीति

 काठमाडौँ-८ असोज। नेकपा (एमाले) को केन्द्रीय कमिटी बैठकले सांगठनिक संरचनालाई पूर्णता दिँदै स्थायी कमिटी विस्तार गरेको छ। ललितपुरको भनिमण्डलस्थित रामबाग महलमा चार दिनदेखि जारी केन्द्रीय कमिटी बैठककै बीच आज बसेको सचिवालय बैठकको सिफारिस बमोजिम ७ जना नेताहरूलाई स्थायी कमिटी सदस्यमा मनोनित गरिएको हो।

यसका साथै, एमालेले पार्टीकी पूर्वउपाध्यक्ष एवं पूर्वराष्ट्रपति विद्यादेवी भण्डारीलाई एमालेको ‘सम्मानित वरिष्ठ नेता’ बनाउने ऐतिहासिक प्रस्ताव बैठकमा पेस गरेको छ, जसलाई केन्द्रीय कमिटीले अनुमोदन गर्ने तयारी गरेको छ।

एमाले स्थायी कमिटीमा को–को समेटिए ?

पार्टीभित्र लामो समयदेखि खाली रहेका सांगठनिक पदहरू भर्ने क्रममा आजको सचिवालय बैठकले स्थायी कमिटी सदस्यको टुङ्गो लगाएको हो । स्थायी कमिटीमा मनोनित हुने नेताहरू यस प्रकार छन्:

१. ईश्वर पोखरेल (पूर्वउपाध्यक्ष) 
२. प्रदीप ज्ञवाली 
३. देवराज घिमिरे 
४. थममाया थापा 
५. शिवमाया तुम्बहाम्फे
६.काशिनाथ अम्गाईं

७.लालबाबु पण्डित

उपमहासचिव लेखराज भट्टका अनुसार अर्को दलबाट एमालेमा समाहित भएका तथा सांगठनिक सन्तुलन मिलाउनुपर्ने अन्य वरिष्ठ नेताहरूलाई समेत समेटेर स्थायी कमिटी र केन्द्रीय कमिटी मनोनयनको सूची तयार पारिएको हो ।

विद्यादेवी भण्डारी एमालेको ‘वरिष्ठ नेता’ प्रस्तावित, दोस्रो वरीयता कायम

राजनीतिक वृत्तमा निकै चासोका साथ हेरिएको पूर्वराष्ट्रपति विद्यादेवी भण्डारीको एमाले राजनीतिमा पुनरागमनलाई आज औपचारिक रूपमा वैधानिक रूप दिइएको छ । पार्टी अध्यक्ष केपी शर्मा ओलीले भण्डारीलाई 'सम्मानित वरिष्ठ नेता' बनाउने प्रस्ताव बैठकसमक्ष लैजानुभएको हो ।

मर्यादाक्रममा अध्यक्षपछिको स्थान: एमाले स्रोतका अनुसार वरिष्ठ नेतामा मनोनीत भएसँगै पार्टीभित्र भण्डारीको मर्यादाक्रम (Hierarchical Rank) अध्यक्ष केपी शर्मा ओलीपछिको दोस्रो स्थानमा रहनेछ ।
जेठमा भएको थियो सदस्यता नवीकरण: यसअघि गत जेठ ३ गते बसेको सचिवालय बैठकले पूर्वराष्ट्रपति भण्डारीको पार्टी सदस्यता नवीकरण गर्ने निर्णय गरेको थियो ।
नेतृत्व पुनर्गठनको बहसबीच सक्रियता: पार्टीभित्र नेतृत्व पुनर्गठन र दोस्रो पुस्तामा शक्ति हस्तान्तरणको बहस तीव्र भइरहेका बेला भण्डारीलाई भित्र्याएर संस्थापन पक्ष (ओली समूह) ले सांगठनिक सन्तुलन कायम राख्ने रणनीति लिएको विश्लेषकहरूको ठहर छ।

ओलीको प्रतिवेदन अनुमोदन, सुहाङ र योगेशको फरक मत

गत असोज ५ गतेदेखि सुरु भएको केन्द्रीय कमिटी बैठकमा अध्यक्ष ओलीले प्रस्तुत गरेको ८८ पृष्ठको विस्तृत राजनीतिक प्रतिवेदनलाई बैठकले सर्वसम्मत रूपमा अनुमोदन गरेको छ।

प्रतिवेदनमाथि धारणा राख्ने क्रममा एमालेका कान्छा केन्द्रीय सदस्य सुहाङ नेम्वाङले "पार्टीभित्रको रोग लुकाएर कम्युनिष्ट आन्दोलन बच्न सक्दैन, पार्टी ठिकठाक अवस्थामा छैन" भन्दै नेतृत्वको आत्मसमीक्षा हुनुपर्ने धारणा राख्नुभएको थियो । त्यस्तै, उपमहासचिव योगेश भट्टराईले ७० वर्षे उमेरहद ब्युँताउनुपर्ने र बाम एकताको निर्मम समीक्षा हुनुपर्ने लिखित माग पेस गरे पनि अन्ततः प्रभावशाली नेताहरू संस्थापन पक्षमै ढल्किएपछि ओलीको प्रतिवेदन सहजै पारित भएको छ ।

केन्द्रीय सदस्यहरूको मनोनयन, पोलिटब्युरो गठन, र विभागहरूको बाँडफाँड सम्बन्धी निर्णयहरूलाई अन्तिम रूप दिँदै एमालेको यो महत्त्वपूर्ण केन्द्रीय कमिटी बैठक आजै समापन गर्ने तयारी गरिएको छ ।