नेदरल्यान्डको जित, वेल्स र अमेरिकाको बराबरी 

दोहा । विश्वकप २०२२ को सोमबार भएका खेलमा दुई बलिया टिम इंग्ल्यान्ड र नेदरल्यान्ड्सले जित निकालेका छन् । वेल्स र अमेरिकाले भने बराबरी खेलेका छन् ।

समूह ‘बी’ को पहिलो खेलमा इंग्ल्यान्डले इरानलाई सजिलै ६–२ ले हरायो । इंग्ल्यान्डका लागि जुड बेलिङघमले गोलको खाता खोलेपछि बुकायो साकाले दुई गोल गरे । 

यस्तै रहिम स्टर्लिङ, मार्कस रसफोर्ड र ज्याक ग्रेलिसले एक एक गोल गरे । इरानका तर्फबाट मेहदी तारेमीले दुई गोल फर्काए, त्यसमध्ये उनले दोस्रो गोल इन्ज्युरी समयको अन्त्यतिर पेनाल्टीबाट रह्यो । यस समूहमा पछि वेल्स र अमेरिकाले १–१ को बराबरी खेले । अमेरिकाले टिम वेहको गोलले पहिलो हाफको ३६ औं मिनेटमा अग्रता लिएको थियो ।  

खेल सकिन नौ मिनेट अगाडि गेराथ बेलले पेनाल्टीबाट बराबरी गोल फर्काए । इंग्ल्यान्ड समूह ‘बी’ मा तीन अंकसहित शीर्ष स्थानमा रह्यो भने त्यस पछाडि वेल्स तथा अमेरिका एक/एक अंकमा रहे ।

समूह ‘ए’ मा शीर्ष स्थान प्राप्तका लागि नेदरल्यान्ड्सले भने सेनेगललाई २–० ले हरायो । डच टिमका लागि कोडी गाक्पोले ८४ र डेभी क्लासेनले इन्ज्युरी समयको नवौं मिनेटमा एक एक गोल गरे ।