रुसी तेल बेचेर भारतले १६ अर्ब डलर कमायो- अमेरिकी अर्थमन्त्री बेसान्ट

काठमाडौँ । अमेरिकी अर्थमन्त्री स्कट बेसान्टले भारतले रूसबाट सस्तो तेल किनेर प्रशोधन गरेपछि उच्च मूल्यमा बेचेर नाफा कमाउने गरेको आरोप लगाएका छन् ।

बेसान्टको यो टिप्पणी यस्तो समयमा आएको हो जब ट्रम्प प्रशासनले भारतमा कुल ५० प्रतिशतको भन्सार कर लगाएको छ । यसमा रूसी तेलको खरिदमा थप २५ प्रतिशतको भन्सार कर पनि समावेश छ, जुन अगस्ट २७ देखि लागू हुनेछ ।

समाचार एजेन्सी पीटीआईका अनुसार, समाचार च्यानल सीएनबीसीमा चीन र भारतसँग अमेरिकाको दोहोरो मापदण्डको बारेमा सोधिएको प्रश्नको जवाफमा बेसान्टले रूस-युक्रेन युद्ध पछि, रूसबाट चीनको तेल आयात केवल ३ प्रतिशतले बढेको छ, जबकि भारतको आयात ४० प्रतिशतभन्दा बढीले बढेको उनले बताएका थिए ।

उनले भने- 'भारतले केवल नाफा कमाएको छ । यसले यसबाट १६ अर्ब डलरको अतिरिक्त नाफा कमाएको छ । भारतका केही धनी परिवारहरूले यसमा नाफा कमाएका छन् । युद्ध सुरु भएदेखि नै भारतको यो व्यापार चलिरहेको छ। यो पूर्ण रूपमा अस्वीकार्य छ ।'

उनले यदि ट्रम्प र पुटिन बीचको वार्तामा कुनै सहमति नभएमा, रूसी तेल खरिद गरेकोमा भारतमाथि थप प्रतिबन्ध लगाउन सकिने समेत बताए ।

भारतले शुल्क लगाउने अमेरिकी कदमलाई अनुचित भनेको छ र आफ्नो राष्ट्रिय हित र आर्थिक सुरक्षाको लागि आवश्यक सबै कदम चाल्ने बताएको छ । पीटीआईका अनुसार, दुई देशहरू बीच अहिलेसम्म पाँच चरणको वार्ता भइसकेको छ, तर अमेरिकी टोलीले अगस्ट २५ बाट प्रस्ताव गरिएको छैटौं चरणको वार्ता रोकेको छ ।