ढुक्क रहनुहोस,एमाले फुट्ने छैन, पुनर्गठन हुनेछ : योगेश भट्टराई

काठमाडौं । सत्तारूढ नेकपा (एमाले) भित्रको आन्तरिक समीकरण र आगामी रणनीतिलाई लिएर विभिन्न अड्कलबाजी भइरहेका बेला पार्टीका उपमहासचिव योगेश भट्टराईले एमाले कुनै पनि हालतमा नफुट्ने दाबी गरेका छन्। सोमबार सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले पार्टीमा सांगठनिक पुनर्गठन हुने तर विभाजन नहुने स्पष्ट पारेका हुन्।

भट्टराईले सामाजिक सञ्जालमा संक्षिप्त र कवितात्मक शैली (छोक) प्रयोग गर्दै पार्टी पंक्ति र शुभचिन्तकहरूलाई निराश नहुन आग्रह गरेका छन्। उनले नेताहरूमा कुनै लोभ र पाप नरहेको उल्लेख गर्दै पार्टी अझ बढी एकताबद्ध र सुदृढ हुने विश्वास दिलाएका छन्।

उनले फेसबुकमा लेखेका छन्:

छोक > ढुक्क रहनुहोस

लोभ छैन

पाप छैन

पुनर्गठन हुनेछ

फुट्ने छैन

टुट्ने छैन

सबै मिल्ने छन्

थप एकताबद्ध हुनेछन्

सबैको सम्मान हुनेछ

मति सुध्रने छ

गति बढ्ने छ

'पुनर्गठन' को संकेत

उपमहासचिव भट्टराईको यो अभिव्यक्तिले एमालेभित्र आन्तरिक कार्यविभाजन, जिम्मेवारी फेरबदल वा सांगठनिक संरचनामा व्यापक हेरफेर (पुनर्गठन) को तयारी भइरहेको संकेत गरेको छ। पछिल्लो समय पार्टीको गति र नेताहरूको कार्यशैलीलाई लिएर उठिरहेका प्रश्नहरूतर्फ लक्षित गर्दै उनले 'मति सुध्रने र गति बढ्ने' बताएका हुन्।

सबै नेता-कार्यकर्ताको सम्मान हुने र कसैलाई पनि पाखा नलगाइने भन्दै उनले एमालेका कार्यकर्ताहरूलाई कुनै पनि भ्रममा नपरी 'ढुक्क रहन' अपिल गरेका छन्। उनको यो सकारात्मक सन्देशले हालैका दिनमा पार्टीभित्र देखिएका केही असन्तुष्टि र असमझदारीहरू संवादमार्फत हल हुने अपेक्षा गरिएको छ।