नेपालले जित्यो वुमेन्स यू–१५ साफ च्याम्पियनसिप

काठमाडौं । नेपालले शुक्रबार वुमेन्स यू–१५ साफ च्याम्पियनसिप जितेको छ र यसका लागि ढाकामा भएको निर्णायक खेलमा बंगलादेशलाई १–१ को बराबरीमा रोकेको हो । नेपालले सुशिला केसीको गोलले १४ औं मिनेटमा अग्रता लिएको थियो । दोस्रो हाफको ५४ औं मिनेटमा बंगलादेशका लागि रुमा अख्तरले बराबरी गोल फर्काइन ।

खेलको अन्त्यतिर विपना स्नेहीले पेनाल्टी एरियामा बल ह्यान्ड गरेपछि प्राप्त पेनाल्टीमा बंगलादेश गोल गर्न असफल रह्यो । बंगलादेशले उपाधि हात पार्नका लागि नेपालमाथि यस खेलमा निश्चित जित निकाल्नु आवश्यक थियो । डबल राउन्ड रोबिनको आधारमा भएको प्रतियोगितामा नेपालको चार खेलबाट १० अंक भएको छ र शीर्षमा रह्यो ।

बंगलादेश भने सात अंकमै सीमित रह्यो । तीन टिम सम्मिलित प्रतियोगितामा भुटान अंकविहीन स्थितिमा पुछारमा रह्यो । नेपालले यसअघि बंगलादेशविरुद्धको पहिलो खेलमा १–० को जित निकालेको थियो । महिला फुटबल इतिहासमा नेपालले उपाधि जितेको यो दोस्रो पल्ट हो । दक्षिण एसियाली फुटबलमै नेपालले उपाधि जितेको भने यो पहिलो पल्ट हो ।