चीनतर्फ अर्को बाढीको महाखतरा: उद्धार कार्य पूर्ण रूपमा रोकियो, उद्धारकर्मीलाई १ किलोमिटर पछि हट्न कडा आदेश

काठमाडौँ, १२ भदौ । तिब्बततर्फ अर्को ठूलो हिमताल वा ग्लेसियर ताल फुटेर दोस्रो ठूलो बाढी (Secondary Flood) आउने निश्चित भएपछि चिनियाँ भूभागमा भइरहेको उद्धार कार्य पूर्ण रूपमा रोकिएको छ। चीनको सीमावर्ती प्रशासनले सम्भावित महाविपद्बाट जोगाउन सीमा क्षेत्रमा खटिएका आफ्ना सम्पूर्ण उद्धारकर्मी, प्राविधिक र सुरक्षाकर्मीहरूलाई तत्काल १ किलोमिटर पछि हट्न कडा आदेश (Evacuation Order) जारी गरेको छ।

चिनियाँ अधिकारीहरूका अनुसार माथिल्लो हिमाली क्षेत्रमा ताल फुटेर पानीको विशाल लहर तलतिर बग्न थालिसकेकाले भोटेकोशी कोरिडोरमा केही समयभित्रै अर्को भयावह बाढी आउने खतरा छ।

नेपाल–चीन सीमा क्षेत्र र रसुवागढी नाका नजिकै चिनियाँतर्फ सडक खुलाउन र बेपत्ताहरूको खोजीमा प्रयोग भइरहेका ठूला डोजर, एस्काभेटर र क्रेन जस्ता हेभी इक्विपमेन्टहरूलाई पनि उद्धार कार्य रोकेर हतार-हतार सुरक्षित र अग्लो स्थानतर्फ लगिएको छ। चीनतर्फ सुरक्षा संवेदनशीलतालाई ध्यानमा राख्दै सीमा क्षेत्रका ब्यारेक र अस्थायी शिविरहरू समेत खाली गराउन थालिएको चिनियाँ सञ्चारमाध्यमहरूले जनाएका छन्। नेपालतर्फ झन् ठूलो जोखिम, सुरक्षाकर्मीलाई सतर्क रहन निर्देशन

चीनतर्फ उद्धार कार्य रोकेर टोली नै १ किलोमिटर पछि हटेको सूचना पाएपछि नेपालको सीमा क्षेत्रमा पनि उच्च सतर्कता अपनाइएको छ। रसुवाका प्रमुख जिल्ला अधिकारी वेदनिधि खनालले चीनको यो कदमले जोखिमको गम्भीरता कति छ भन्ने स्पष्ट पारेको भन्दै नेपाली सुरक्षाकर्मी र स्थानीय बासिन्दालाई थप चनाखो हुन आग्रह गर्नुभएको छ।

नेपालतर्फ पनि भोटेकोशी र त्रिशूली नदीको किनारमा खटिएका नेपाली सेना, नेपाल प्रहरी र सशस्त्र प्रहरी बलका टोलीहरूलाई सुरक्षित स्थानमा बसेर निगरानी गर्न र नदी तटीय क्षेत्रमा कोही पनि सर्वसाधारणलाई जान नदिन कडा निर्देशन दिइएको छ। बाढीले पहिले नै ४६९ जनाको ज्यान लिइसकेको र ४१ वटा पुल ध्वस्त पारिसकेको अवस्थामा यो नयाँ खतराले सीमावर्ती क्षेत्रमा थप सन्त्रास फैलाएको छ।