कांग्रेसमा वडादेखि केन्द्रसम्मको संस्थागत गुटबन्दी अन्त्य गर्ने गगन थापाको उद्घोष: ‘गुटको फेरो समातेर अवसर पाउने दिन सकिए, अब सबैलाई समेटेर अघि बढ्छौँ’

काठमाडौं । नेपाली कांग्रेसका महामन्त्री गगनकुमार थापाले पार्टीभित्र वडा तहदेखि केन्द्रसम्म जरा गाडेर बसेको संस्थागत गुटबन्दी पूर्ण रूपमा अन्त्य गर्ने घोषणा गरेका छन्। पार्टीको संगठन सुदृढीकरण तथा आन्तरिक रूपान्तरण अभियानका क्रममा नेता-कार्यकर्ताहरूलाई पोखरामा आयोजित एक कार्यक्रमलाई सम्बोधन गर्दै  महामन्त्री थापाले गुटबन्दीकै कारण कांग्रेसको आन्तरिक ऊर्जा र जनभरोसा कमजोर बन्दै गएकाले अब सबै पक्षलाई समेटेर बृहत् एकताका साथ अघि बढ्ने दाबी गरे।

पार्टीभित्र गुटको फेरो समातेकै भरमा अवसर पाउने बेथितिको अन्त्य गरी विधि, पद्धति र कार्यकर्ताको सही मूल्यांकनको जग बसाल्न आफू लागिपर्ने उनले दृढता व्यक्त गरे।

महामन्त्री थापाले नेपाली कांग्रेसको सबैभन्दा ठूलो सत्रु पार्टीभित्रै संस्थागत स्वरूप ग्रहण गरिसकेको गुटबन्दी भएको औंल्याए। उनले भने, "हाम्रो गुटबन्दी अब विचारको रहेन, यो केवल पद र अवसरको भागबण्डा गर्ने गिरोह जस्तो बनेको छ। वडा कार्यसमितिदेखि केन्द्रीय समितिसम्म यो क्यान्सर जस्तै फैलिएको छ। यसलाई समयमै शल्यक्रिया नगर्ने हो भने पार्टीको भविष्य संकटमा पर्छ।"

उनले अबको कांग्रेसमा गुट सञ्चालन गर्ने वा गुटका आडमा नेताको चाकडी गर्ने परिपाटीलाई निरूत्साहित गरिने स्पष्ट पारे। महामन्त्रीको हैसियतमा आफूले पार्टी विधानको अक्षरशः पालना गराउँदै संगठनलाई व्यक्तिवादी चरित्रबाट मुक्त गराउने प्रतिबद्धता समेत उनले जनाए।

पार्टीभित्र फरक मत राखेकै आधारमा नेता-कार्यकर्ताहरू पाखा लाग्नुपर्ने अवस्थाको अन्त्य गर्ने थापाको प्रमुख दाबी छ। विगतका आन्तरिक प्रतिस्पर्धा र निर्वाचनका क्रममा उत्पन्न भएका तित्तताहरूलाई बिर्सिएर अघि बढ्नुपर्नेमा उनले जोड दिए।

पार्टीभित्र स्वस्थ प्रतिस्पर्धा लोकतन्त्रको सुन्दर पक्ष भए पनि त्यसलाई व्यक्तिगत सत्रुताका रूपमा लिन नहुने भन्दै उनले विरोधी पक्षका कार्यकर्तालाई पनि उचित जिम्मेवारी र सम्मान दिइने बताए। अबको कांग्रेसमा क्रियाशीलता, इमानदारिता, जनतामाझको लोकप्रियता र विषयगत क्षमताका आधारमा मात्र जिम्मेवारी र टिकट वितरण हुने प्रणाली स्थापना गरिने उनको भनाइ छ।

महामन्त्री थापाले कांग्रेस लामो समयदेखि सत्ता जोडघटाउ र आन्तरिक शक्ति संघर्षमा अल्झिँदा आफ्नो मूल सिद्धान्त र वैचारिक स्पष्टताबाट विमुख हुँदै गएको स्वीकार गरे। उनले अब पार्टीलाई नागरिकका दैनिक समस्या, सुशासन, आर्थिक रूपान्तरण, उत्पादनमुखी अर्थतन्त्र र रोजगारी सिर्जना जस्ता जनमुखी एजेन्डाहरूमा केन्द्रित गराइने बताए। "हामीले चुनाव जित्ने मात्र होइन, देश कसरी बदल्ने भन्ने स्पष्ट खाका जनतामाझ लैजानुपर्छ," थापाले थपे।

परम्परागत गुटबन्दी र आन्तरिक किचलोका कारण नयाँ तथा युवा पुस्तामा कांग्रेस र समग्र राजनीतिप्रति नैराश्यता बढेको तर्फ इंगित गर्दै महामन्त्री थापाले पार्टीलाई आधुनिक बनाउनुको विकल्प नरहेको औंल्याए। कांग्रेसलाई डिजिटल र प्रविधिमैत्री बनाउँदै युवाहरूको नवीन सोच, ऊर्जा र विज्ञतालाई पार्टीको नीति निर्माण तहमा ठाउँ दिने विशेष योजना उनले अघि सारे।

महामन्त्री गगन थापाको यो घोषणालाई कांग्रेस वृत्तमा निकै अर्थपूर्ण रूपमा हेरिएको छ। पार्टीको महाधिवेशन र भावी नेतृत्वको दौडका पृष्ठभूमिमा उनले आन्तरिक एकता र आमूल सुधारको एजेन्डालाई मुख्य हतियार बनाउन खोजेको राजनीतिक विश्लेषकहरूको बुझाइ छ।