आफैंले चलाएको जिप दुर्घटनामा प्यूठानको स्वर्गद्वारी नगरपालिकाका उपप्रमुख मीनराज राना मगरको मृत्यु

प्यूठान, १३ असार । प्यूठानको स्वर्गद्वारी नगरपालिकाका उपप्रमुख (उपमेयर) मीनराज राना मगरको आफैंले चलाएको जिप दुर्घटनामा परी दुःखद निधन भएको छ। शनिबार अपराह्न पौने ५ बजेतिर नगरपालिकाको सरकारी गाडी दुर्घटना हुँदा ५० वर्षीय राना मगरको घटनास्थलमै मृत्यु भएको हो।

सडकबाट ५०० मिटर तल खस्यो जिप
जिल्ला प्रहरी कार्यालय प्यूठानका अनुसार स्वर्गद्वारी नगरपालिका–२ बाङ्गेसल्लास्थित सडक खण्डमा दुर्घटना भएको हो। स्वर्गद्वारीबाट धनवाङतर्फ जाँदै गरेको लु प्र ०१-००१ झ ०००८ नम्बरको नगरपालिकाको नाममा रहेको बोलेरो पिकअप जिप सडकबाट अनियन्त्रित भई करिब ५०० मिटर तल खसेको थियो। जिपमा उपप्रमुख राना मगर एक्लै सवार रहेको प्रहरीले पुष्टि गरेको छ।

अनुगमनका लागि निस्किएका थिए उपमेयर
प्यूठानका प्रहरी नायब उपरीक्षक (डीएसपी) नरहरि अधिकारीका अनुसार उपप्रमुख राना शनिबार दिउँसो नगरपालिकाको योजना वा क्षेत्र अनुगमनका लागि सरकारी सवारी साधन लिएर निस्किएका थिए। उनी आफैंले सवारी साधन चलाइरहेको अवस्थामा गाडी अचानक सडकबाट तल खसेको थियो। 

घटनालगत्तै अस्थायी प्रहरी पोस्ट खाल र इलाका प्रहरी कार्यालय भिङ्ग्रीबाट प्रहरी निरीक्षकको कमाण्डमा उद्धार टोली घटनास्थलतर्फ खटिएको थियो। भीर र अप्ठ्यारो खोंच भएकाले उद्धारमा केही समय लागेको थियो। घटनाको जानकारी पाएलगत्तै प्रमुख जिल्ला अधिकारी (प्रजिअ) सहितको सुरक्षा निकायको उच्च टोली पनि घटनास्थल पुगेको थियो।

पार्टी र नगरलाई अपूरणीय क्षति
मृतक राना मगर राष्ट्रिय जनमोर्चा (राजमो) बाट वर्गद्वारी नगरपालिकाको उपप्रमुखमा निर्वाचित भएका थिए। उनको असामयिक निधनले प्यूठान र समग्र लुम्बिनी प्रदेशको राजनीतिक वृत्त तथा स्थानीय तहमा गहिरो शोक छाएको छ। प्रहरीले शवलाई पोस्टमार्टमका लागि जिल्ला अस्पताल लैजाने तयारी गरिरहेको र दुर्घटनाको प्राविधिक कारणबारे थप अनुसन्धान भइरहेको जनाएको छ।