प्रधानसेनापतिकाे अस्ट्रेलिया भ्रमणलाई लिएर माओवादी सांसदकाे प्रश्न

सत्ता साझेदार नेकपा (माओवादी केन्द्र) का सांसदले प्रधानसेनापति प्रभुराम शर्माको अस्ट्रेलिया भ्रमणलाई लिएर प्रश्न उठाएका छन् । प्रधानसेनापति शर्माले 'एनुअल चिफ अफ डिफेन्स कन्फ्रेन्स' मा भाग लिन साउन ९ देखि ११ गतेसम्म अस्ट्रेलिया भ्रमण गर्ने तय भएकोबारे माओवादी सांसदले प्रश्न उठाएका हुन् । 

प्रतिनिधि सभा सदस्य अञ्जना विशुङ्खेले अस्ट्रेलियामा हुन थालेको आईपीएसको अन्तर्राष्ट्रिय सम्मेलनमा नेपाली सेनाका प्रधानसेनापतिलाई कुन हैसियतमा पठाउन लागेको भन्दै सरकारसँग जवाफ माग गर्नुभयो । उहाँले सरकारले एमसीसी आईपीएसको सदस्य अङ्ग नभएको भन्दै नेपालको संसदबाट एमसीसी पास गर्ने अनि त्यही आईपीएसको सम्मेलनमा सेनापति सहभागिका लागि पठाएर सरकारले नेपालको असंग्लन परराष्ट्र नीति मिचेको आरोप लगाउनुभयो ।

उहाँले भन्नुभयो, ‘नेपाल आईपीएसको सदस्य अङ्ग होइन भनेर एमसीसी संसदबाट पारित गराउँदा यसैसँग १२ बुँदे घोषणा समेत संसदबाट पारित गराइएको थियो । तर यो निर्णयलाई लत्याएर सरकारले नेपाली सेनाका प्रधानसेनापतिलाई आईपीएसको सम्मेलनमा कुन हैसियतले सहभागिता जनाउन पठायो । यसको जवाफ सभामुखमार्फत सरकारसँग माग गर्दछु ।’

त्यस्तै सांसद अमृता थापाले सरकारले एसपीपीमा सहभागी नहुने निर्णय गर्ने तर प्रधानसेनापतिकाे अस्ट्रेलिया भ्रमण मन्त्रिपरिषदबाट पारित भइरहेको कुरा साँचो भए तत्काल सच्याउन माग गर्नुभयो ।