गठबन्धनकाे गाँठागुँठी नमिलेर चुनावकाे मिति घाेषणा गर्न ढिलाे भएकाे हाे ? : लालबाबु पण्डित

प्रतिनिधि सभा सदस्य लालबाबु पण्डितले सङ्घ र प्रदेशको चुनावकाे मिति घोषणा गर्न सरकारसँग माग गर्नुभएको छ । 

आज आइतवार प्रतिनिधि सभा बैठकको शून्य समयमा बोल्दै प्रतिनिधि सभा सदस्य पण्डितले सरकारले चुनावको मिति घोषणा गर्न ढिलाइ गरेकोप्रति असन्तुष्टि व्यक्त गर्नुभयो । उहाँले चुनाव नगरि गठबन्धन टिकाउनका लागि मिति घोषणा नगरिएको हो कि भन्ने आशङ्का व्यक्त गर्नुभयो । उहाँले भन्नुभयो, ‘गठबन्धन सरकारले निर्वाचनको मिति घोषणा गर्न किन ढिलाइ गरिरहेको छ ? गठबन्धनको गाँठागुँठी नमिलेर हो कि ? आशीर्वाद लिन गएको ठाउँबाट आशीर्वाद नपाएर हो कि ? या चुनाव नगराउने मनसायले, गठबन्धन लामो समय टिकाउनका निम्ति हो कि जनता जान्न चाहन्छन् ।’

प्रतिनिधि सभा सदस्य विद्या भट्टराईले सरकारले बालविकासको उचित व्यवस्थापन गर्न नसकेको बताउनुभयो । उहाँले बालविकासमा कार्यरत सहयोगी कार्यकर्तालाई निर्धारित तलब नदिइएको भन्दै सरकारको ध्यानाकर्षण गराउनुभयो । 

प्रतिनिधि सभा सदस्य बिनादेवी बुढाथोकीले राष्ट्रिय भूमि आयोगले काम सुस्त रूपमा गरेको बताउनुभयो । उहाँले जग्गाको नापी भइसकेको स्थानमा जग्गा धनी पुर्जा वितरण गर्न सरकारको ध्यानाकर्षण गराउनुभयो ।

प्रतिनिधि सभा सदस्य विमला विश्वकर्माले मिर्गौला र क्यान्सर पीडितलाई मासिक पाँच हजार रुपैयाँ दिने प्रतिबद्धता कार्यान्वयन गर्न सरकारलाई ध्यानाकर्षण गराउनुभयो ।

प्रतिनिधि सभा सदस्य शान्ता चौधरीले मुक्तकमैया र मुक्तकमलरीहरूको अहिलेसम्म यथोचित पुनर्स्थान नभएको भन्दै गुनासाे गर्नुभयाे । उहाँले सरकार र मुक्त कमलरीबीच भएको दश बुँदे सहमति यथाशीघ्र कार्यान्वयन गर्न माग गर्नुभयो । 

प्रतिनिधि सभा सदस्य शेरबहादुर तामाङले नेपाली कांग्रेस नेतृत्वको सरकारले विसं २०४८ सालमा नीजिकरण गरिएको उद्योग कस्तो अवस्थामा छ त्यसको संसदीय समिति बनाएर छानबिन गर्न माग गर्नुभयो ।

प्रतिनिधि सभा सदस्य सत्य पहाडीले सामाजिक सुरक्षा भत्ता लिन पालिकाको केन्द्रसम्म जानुपर्ने अवस्था कतिपय ठाउँमा कठिन भएका कारण वडामै घुम्ती बैंकिङ सेवामार्फत दिने व्यवस्था मिलाउन सरकारको ध्यानाकर्षण गराउनुभयो ।

प्रतिनिधि सभा सदस्य समिना हुसेनले मधेस प्रदेशमा महिला हिंसा र हत्याको घटना बढेको उल्लेख गर्दै अपराधी र दोषीलाई कानुनी कारबाही गर्न माग गर्नुभयो ।

प्रतिनिधि सभा सदस्य हीरा गुरुङले द्वन्द्व पीडितको समस्या समाधान गर्नका लागि योजना ल्याउन सरकारसँग माग गर्नुभयो । राजनीतिक परिवर्तन गर्न भूमिका खेल्ने द्वन्द्व पीडितको मन नदुखाउन पनि उहाँकाे आग्रह छ ।