कतारको रास लाफान इन्डस्ट्रियल सिटीमा विष्फोट: १२ भारतीय नागरिकको मृत्यु, ६६ घाइते

काठमाडौँ, ९ असार । विश्वकै सबैभन्दा ठूलो तरल प्राकृतिक ग्यास (LNG) निर्यात हबमध्येको एक कतारको रास लाफान औद्योगिक सहरमा भीषण विष्फोट र आगलागी भएको छ। कतारको आन्तरिक मन्त्रालय र ऊर्जा मन्त्रालयका अनुसार 'बार्जन स्थानीय ग्यास आपूर्ति केन्द्र' मा मर्मतपछि पुनः उत्पादन सुरु गर्ने क्रममा आइतबार साँझ सो दुर्घटना भएको हो।

विष्फोट यति शक्तिशाली थियो कि यसको धक्का उद्योगभन्दा करिब ४० माइल (६४ किलोमिटर) टाढा रहेको राजधानी दोहाको केन्द्रभागसम्म महसुस गरिएको थियो, जसका कारण स्थानीय बासिन्दाहरूमा त्रास फैलिएको थियो। कतारका ऊर्जामन्त्री साद बिन श्रैदा अल-काबीले सोमबार पत्रकार सम्मेलन गर्दै घटनाको पुष्टि गरेका हुन्।

मन्त्री अल-काबीका अनुसार यो विष्फोट कुनै बाह्य आक्रमण वा सबोटाइज (षड्यन्त्र) नभई 'प्राविधिक गढबढी' (Technical Malfunction) का कारण भएको हो।इरान युद्धका क्रममा गत मार्च महिनामा क्षति पुगेको यस प्लान्टलाई लामो समयको मर्मतपछि दुई दिनअघि मात्रै पुनः सञ्चालन (Start-up Operations) मा ल्याउने प्रयास भइरहेको थियो। भारतीय दूतावासद्वारा मृत्यको पुष्टि र शव फिर्ताको तयारीदोहास्थित भारतीय दूतावासले आफ्नो आधिकारिक 'एक्स' (ट्विटर) ह्यान्डलमार्फत कतारी अधिकारीहरूले १२ जना भारतीय नागरिकको मृत्यु भएको पुष्टि गरेको जनाएको छ। 

रास लाफान औद्योगिक क्षेत्रले विश्वको कुल एलएनजी (LNG) आपूर्तिको झन्डै पाँचौँ हिस्सा ओगट्छ। विष्फोटको खबर बाहिरिएसँगै अन्तर्राष्ट्रिय वित्तीय बजारमा ग्याँसको होलसेल मूल्यमा ४ प्रतिशतसम्मको वृद्धि देखिएको छ।कतार इनर्जीले भने यो विष्फोटले कतारको अन्तर्राष्ट्रिय निर्यात क्षमतामा कुनै असर नगर्ने र आन्तरिक बजारको आपूर्तिलाई समेत नियन्त्रणमा राखिने स्पष्ट पारेको छ। दुर्घटनास्थलमा कुनै पनि ग्यास चुहावट नभएकाले सार्वजनिक सुरक्षामा थप खतरा नरहेको अधिकारीहरूले दाबी गरेका छन्।  

नेपाली कामदारहरूको अवस्था के छ?

रास लाफान औद्योगिक क्षेत्रमा ठूलो संख्यामा नेपाली श्रमिकहरू पनि कार्यरत छन्। यद्यपि, अहिलेसम्म प्राप्त आधिकारिक विवरणहरूमा यस दुर्घटनामा कुनै पनि नेपाली नागरिक परेको वा घाइते भएको रिपोर्ट आएको छैन। दोहास्थित नेपाली दूतावासले पनि स्थितिको अनुगमन गरिरहेको बुझिएको छ।