वर्षमा एक दिन मात्र खुल्ने 'तलेजु भवानी मन्दिर' भोलि खुला हुँदै: बिहान ५ बजेदेखि नै दर्शन गर्न

काठमाडौँ । बडादसैँको विशेष दिन महानवमीका अवसरमा भोलि कात्तिक ४ गते मङ्गलबार बिहान ५ बजेदेखि नै हनुमानढोकास्थित ऐतिहासिक तलेजु भवानीको मन्दिर सर्वसाधारणका लागि खुल्ला गरिने भएको छ। वर्षमा केवल एक दिन, महानवमीका दिन मात्र सर्वसाधारणका लागि खुल्ने यस मन्दिरमा भोलि दिनभर पूजाआराधना र दर्शन गर्न पाइने हनुमानढोका हेरचाह अड्डाले जनाएको छ।

हनुमानढोका दरबार क्षेत्रमा रहेको तलेजु भवानी मन्दिरमा लामो समय लाइनमा बस्नुपर्ने बाध्यतालाई ध्यानमा राख्दै भोलि बिहान ५ बजेदेखि नै सर्वसाधारणका लागि प्रवेश खुला गरिने व्यवस्था मिलाइएको हो। मन्दिरमा लामबद्ध हुने भक्तजनहरूको सुरक्षा, खानेपानी र सहज दर्शनका लागि स्वयम्सेवक तथा सुरक्षाकर्मीहरूको विशेष टोली परिचालन गरिसकिएको छ।

वर्षमा एक दिन मात्र खुल्ने ऐतिहासिक मन्दिर

मल्लकालीन राजा हरिहरसिंह मल्ल र जगज्ज्योति मल्लको पालादेखि तलेजु भवानीलाई नेवार समुदाय र तत्कालीन मल्ल राजाहरूको इष्टदेवीका रूपमा पूज्ने परम्परा रहिआएको छ। तुलजा भवानीका रूपमा समेत चिनिने यस मन्दिरमा सर्वसाधारणलाई वर्षको अन्य दिन प्रवेश निषेध गरिन्छ। महानवमीका दिन माता तलेजुको दर्शन गर्नाले सुख, समृद्धि, पारिवारिक कल्याण हुनुका साथै सम्पूर्ण मनोकांक्षा पूरा हुने जनविश्वास छ।

महानवमीका दिन बिहानै तलेजु भवानी मन्दिरमा सरकारी तवरबाट ५४ वटा बोका र ५४ वटा राँगाको विशेष बलिसहित कालरात्रि पूजा र महापूजा सम्पन्न गरिने धार्मिक विधि छ। सरकारी पूजा सम्पन्न भएलगत्तै सर्वसाधारणका लागि ढोका खुल्ला गरिनेछ।

भक्तपुर र पाटनका तलेजुमा पनि विशेष पूजा

काठमाडौँको हनुमानढोकाका साथै भक्तपुर दरबार क्षेत्र र ललितपुरको पाटन दरबार क्षेत्रमा रहेका तलेजु भवानी मन्दिरहरूमा पनि भोलि महानवमीका दिन विशेष पूजाअर्चना गरिँदैछ। भक्तपुर र पाटनका मन्दिरहरूमा सर्वसाधारणका लागि फरक व्यवस्था भए पनि हनुमानढोकाको मुख्य मन्दिर रैथाने कला र वर्षमा एक दिन मात्र खुल्ने भएकाले यहाँ देशैभरबाट लाखौँ भक्तजनहरूको घुइँचो लाग्ने गर्दछ।