भोटेकोशी बाढी: उद्धार, राहत र नीतिगत सुधारका लागि एक हप्ताभित्र सर्वदलीय संयन्त्र बन्ने

काठमाडौँ: रसुवाको भोटेकोशी नदीमा आएको विनाशकारी बाढीपछिको उद्धार, राहत, पुनर्स्थापना र दीर्घकालीन नीतिगत सुधारका लागि आगामी सात दिनभित्र सर्वदलीय उच्चस्तरीय संयन्त्र गठन गर्ने सहमति भएको छ।

राष्ट्रिय स्वतन्त्र पार्टी (रास्वपा) का सभापति रवि लामिछानेको पहलमा बुधबार बसेको सर्वदलीय बैठकले संसद्मा प्रतिनिधित्व गर्ने सबै राजनीतिक दलहरूलाई समावेश गरी उक्त संयन्त्र बनाउने निर्णय गरेको हो।

रास्वपाका प्रवक्ता एवं सांसद जगदीश खरेलका अनुसार, राष्ट्रिय सभा र प्रतिनिधि सभामा रहेका दलहरूको सिट संख्याका आधारमा प्रतिनिधित्व हुने गरी एक हप्ताभित्र संसदीय समिति गठनका लागि सभामुखलाई आग्रह गर्ने सहमति भएको छ।

यसअघि भदौ १० गते बाढी आएको भोलिपल्टै रास्वपा सभापति लामिछानेले आह्वान गरेको सर्वदलीय बैठकमा यस्तो संयन्त्र वा संसदीय समिति बनाउने प्रस्ताव गरिएको थियो। भदौ १६ को बैठकले सैद्धान्तिक सहमति जनाएको भए पनि बुधबारको बैठकले संयन्त्र निर्माणका लागि ७ दिनको स्पष्ट समयसीमा नै तय गरेको हो।

यो संयन्त्रले संकटको समयमा उद्धार र राहतमा काम गर्नुका साथै विपद्पूर्व तयारी, जलवायु अनुकूलन, राष्ट्रिय विपद् नीतिमा सुधार तथा सरकारका कामकारबाहीको अनुगमन र निरन्तर सल्लाह-सहयोग प्रदान गर्ने कार्य गर्नेछ।

यस्तै, बैठकमा प्रधानमन्त्री बालेन्द्र (बालेन) शाहको आगामी संयुक्त राष्ट्रसंघको महासभा भ्रमण र उक्त अन्तर्राष्ट्रिय मञ्चलाई नेपालको विपद् संकट तथा जलवायु न्यायका पक्षमा कसरी प्रभावकारी रूपमा सदुपयोग गर्ने भन्नेबारे समेत गहन छलफल भएको छ।