गणतन्त्र राष्ट्र निर्माणको एक महान् अभिभारा हो : राष्ट्रपति पौडेल

काठमाडौं। नागरिक सर्वोच्चतासहित मुलुकमा संघीय लोकतान्त्रिक गणतन्त्र स्थापना भएको ऐतिहासिक दिनको स्मरणमा आज सैनिक मञ्च टुँडिखेलमा भव्य समारोह आयोजना गरिएको छ। १९औँ गणतन्त्र दिवस २०८३ का अवसरमा आयोजित उक्त विशेष समारोहमा देशभक्ति र राष्ट्रिय एकताको अनुपम रौनक देखिएको छ।

गणतन्त्र दिवस मूल समारोह समितिद्वारा आयोजित कार्यक्रममा सहभागी हुन राष्ट्रपति रामचन्द्र पौडेल, उपराष्ट्रपति रामसहायप्रसाद यादव, प्रधानमन्त्री बालेन्द्र शाहसहित राज्यका उच्चपदस्थ अधिकारीहरू, मन्त्रीगण र विदेशी कूटनीतिक नियोगका प्रमुखहरू टुँडिखेल पुगेका थिए। हेलिकप्टरबाट ‘१९औँ गणतन्त्र दिवस’ अङ्कित ब्यानर प्रदर्शन र पुष्पवृष्टिसँगै समारोहको औपचारिक सुरुवात गरिएको थियो ।

समारोहको मुख्य आकर्षण नेपाली सेना, नेपाल प्रहरी र सशस्त्र प्रहरी बलको संयुक्त मार्चपास तथा सैनिक कौशल प्रदर्शन रह्यो । सैनिक ब्यान्डको सुमधुर र देशभक्तिपूर्ण धुनका बीच सुरक्षा निकायका जवानहरूले सानदार कला प्रदर्शन गरेका थिए। सेनाले प्रस्तुत गरेको विभिन्न युद्धकला र मार्चपासले टुँडिखेलमा उपस्थित भद्रभलादमी तथा सर्वसाधारणलाई मन्त्रमुग्ध पारेको थियो ।

समारोहमा राष्ट्रपति पौडेललाई नेपाली सेनाको टुकडीले सलामी अर्पण गरेको थियो भने शहीदहरूको सम्मानमा शोक धुनसँगै सलामी चढाइएको थियो । टुँडिखेलमा सुरक्षा निकायका तर्फबाट विभिन्न विपद् व्यवस्थापन र उद्धार कार्यको नमुना प्रदर्शन समेत गरिएको थियो। यसका साथै नेपालको बहुसांस्कृतिक र बहुजातीय पहिचान झल्काउने विभिन्न सांस्कृतिक झाँकी र नृत्यहरू प्रस्तुत गरिएका थिए।

सातै प्रदेशको प्रतिनिधित्व हुने गरी निकालिएका परम्परागत भेषभूषा र सांस्कृतिक झाँकीले नेपालको ‘विविधतामा एकता’ को बलियो सन्देश दिएको थियो । समारोहलाई सम्बोधन गर्दै राष्ट्रपति रामचन्द्र पौडेलले गणतन्त्र राष्ट्र निर्माणको एक महान् प्रेरणा र अभिभारा भएको बताउँदै यस व्यवस्थाले नागरिकलाई नै शक्तिको अन्तिम स्रोत बनाएको उल्लेख गरे। उनले यो व्यवस्थालाई अझ सुन्दर बनाउन शासकीय चरित्र र आचरणमा सुधार हुनुपर्नेमा जोड दिएका थिए ।

समारोहको अन्त्यमा शान्तिका दूत मानिने सेता परेवा र रङ्गीचङ्गी बेलुनहरू आकाशमा उडाइएको थियो, जसले गर्दा केही बेर टुँडिखेलको आकाश निकै मनमोहक देखिएको थियो। सञ्चारमाध्यमका प्रतिनिधि, तस्बिर पत्रकार र सर्वसाधारणको उल्लेख्य उपस्थितिले टुँडिखेलमा गणतन्त्र दिवसको रौनक साँच्चिकै ऐतिहासिक र उत्सवमय बनेको थियो। 

यस्तै राष्ट्रपति ]पौडेलले गणतन्त्र संसारकै उत्कृष्ट व्यवस्था भएको बताएका छन् । काठमाडौंको टुँडिखेलमा आयोजित १९औँ गणतन्त्र दिवसको अवसरमा आयोजित विशेष कार्यक्रमलाई सम्बोधन गर्दै राष्ट्रपति पौडेलले गणतन्त्र संसारकै उत्कृष्ट व्यवस्था भएको बताउँदै यस व्यवस्थाले जनतालाई सार्वभौम सत्ता सम्पन्न बनाएको बताएका हुन् ।

उनले लोकतन्त्रमा अन्तिम मालिक जनता नै हुन् भन्ने मान्यता स्थापित भएको भन्दै संविधानले निदिष्ट गरेको व्यवस्था अनुसारनै यसको अभ्यास भइरहेको बताए । गणतन्त्रले एकताबद्ध भएर अगाडी जाने अवसर दिएको भन्दै सबै किसिमका राजनीतिक अधिकार समेत दिएको राष्ट्रपति पौडेलले बताए ।  राजनीतिक उपलब्धिहरूले मात्र परिवर्तनलाई जनतासँग जोड्न पर्याप्त नहुने भन्दै उनले शासकीय चरित्रले परिवर्तनलाई जनतासँग जोड्नुपर्ने बताए । 

राष्ट्रपति पौडेलले प्राप्त राजनीतिक उपलब्धिको जगमा आर्थिक उन्नतिको जग बसाल्नु पर्ने भन्दै शासकीय संरचना र राज्यका अङ्गहरूलाई गतिशील बनाएर सुशासन दिनै पर्ने बताए । राष्ट्रपति पौडेलले अहिले बलियो जनादेशको सरकार बनेको उल्लेख गर्दै शासकीय सुधारका सय बुँदे कार्यसूची ल्याएर काम गरिरहेको बताए । गणतन्त्रको मर्यादालाई बचाउन र यसलाई समृद्ध बनाउन सबैले आफ्नो आचरणलाई सुधार गरेर काम गर्नेमा राष्ट्रपति पौडेलले विश्वास व्यक्त गरेका छन् ।

गणतन्त्र दिवसको अवसरमा आयोजित विशेष कार्यक्रमलाई यसअघि प्रधानमन्त्रीले सम्बोधन गर्ने प्रचलन रहे पनि यस पटक पहिलो पटक राष्ट्रपतिले सम्बोधन गरेका हुन् ।