संविधान र गणतन्त्र रक्षाका लागि सबै परिवर्तनकारी शक्तिहरू एकजुट हुनुपर्छ: प्रचण्ड

काठमाडौँ । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले देशमा प्राप्त भएका ऐतिहासिक राजनीतिक उपलब्धिहरूमाथि नियोजित र सुनियोजित रूपमा नकारात्मक प्रचार भइरहेको बताउनुभएको छ।

बिहीबार काठमाडौँमा आयोजित एक कार्यक्रमलाई सम्बोधन गर्दै पूर्वप्रधानमन्त्री समेत रहनुभएका अध्यक्ष प्रचण्डले गणतन्त्र, सङ्घीयता, समानुपातिक-समावेशी व्यवस्था र नयाँ संविधानले जनतालाई दिएका अधिकारहरूलाई ओझेल पार्ने प्रपञ्च भइरहेको बताउनुभयो।

"सयौँ वर्षको बलिदान र सङ्घर्षबाट प्राप्त भएका उपलब्धिहरूलाई कमजोर बनाउने र जनतामा निराशा फैलाउने काम भइरहेको छ," अध्यक्ष प्रचण्डले भन्नुभयो, "गणतन्त्रले ल्याएका सकारात्मक परिवर्तनहरूलाई लुकाएर केवल नकारात्मक कुराहरूको मात्रै प्रचार गरिनु राजनीतिक व्यवस्थामाथिकै हमला हो।"

उहाँले देशमा अझै पनि सुशासन, विकास र समृद्धिको यात्रामा धेरै काम गर्न बाँकी रहेको स्वीकार गर्दै प्राप्त उपलब्धिहरूको रक्षा गर्दै अघि बढ्नुपर्नेमा जोड दिनुभयो। वर्तमान राजनीतिक परिवर्तनलाई जोगाउन र संविधानको पूर्ण कार्यान्वयनका लागि सम्पूर्ण परिवर्तनकारी तथा देशभक्त शक्तिहरू एक ठाउँमा उभिनुपर्ने आवश्यकता उहाँले औंल्याउनुभयो।

अध्यक्ष प्रचण्डले माओवादी केन्द्र सदैव जनताका मुद्दा, सामाजिक न्याय र सुशासनको पक्षमा दृढताका साथ उभिने प्रतिबद्धता समेत व्यक्त गर्नुभयो।