गगन थापाले बोलाएको महाधिवेशन अवैध र अनैतिक रहेको उपसभापति पूर्णबहादुर खड्काको आरोप

काठमाडौँ। नेपाली कांग्रेसका उपसभापति पूर्णबहादुर खड्काले महामन्त्री गगन थापाको नेतृत्वमा आयोजना हुन लागेको महाधिवेशन वा भेलामा सहभागी हुनु चरम अनैतिक हुने बताएका छन्। पार्टीको संस्थागत निर्णय, विधान र स्थापित पद्धति विपरीत हुने यस्ता गतिविधिमा सहभागी नहुन उनले नेता तथा कार्यकर्ताहरूलाई चेतावनी दिएका छन्।

पार्टीभित्रको आन्तरिक विवाद र गुटबन्दी चरम उत्कर्षमा पुगेको टिप्पणी गर्दै उपसभापति खड्काले भने, "अब यदि कुनै चमत्कार भएन भने नेपाली कांग्रेस पार्टी विभाजनकाे अन्तिम डिलमा पुगेकाे अवस्था छ।" उनले पार्टीको आधिकारिक प्रक्रिया र विधानलाई मिचेर गरिने कुनै पनि भेला वा महाधिवेशनले कांग्रेसलाई औपचारिक विभाजनतर्फ धकेल्ने चेतावनी दिए।

उनले थप भने, "पार्टीको केन्द्रीय कार्यसमितिको निर्णय र विधानभन्दा बाहिर गएर आयोजना गरिने कुनै पनि गतिविधिमा सहभागी हुनु राजनीतिक र नैतिक दुवै हिसाबले गलत हो।" पार्टी एकता कायम राख्न र विधानको पालना गर्न सबै पक्षलाई जिम्मेवार बन्नसमेत उनले आग्रह गरेका छन्।