खेलकुद विश्वविद्यालय सञ्चालनको तयारीमा छौँ- मन्त्री गहतराज

युवा तथा खेलकुदमन्त्री महेश्वर गहतराजले नेपालमा खेलकुद विश्वविद्यालय सञ्चालनका लागि अध्ययन भइरहेको बताउनुभएको छ । राष्ट्रिय खेलकुद परिषद् र राष्ट्रिय स्कुल खेलकुद महासङ्घको संयुक्त आयोजनामा सुरू भएको तीनदिने विद्यालय खेलकुद शिक्षक तालिमको उद्घाटन गर्दै उहाँले खेल क्षेत्रको विकासका लागि खेलकुद विश्वविद्यालयको आवश्यकता महसुस भएको बताउनुभएको हो ।
 
नेपालमा सबै प्रकृतिका खेल खेल्न सक्ने उपयुक्त वातावरण रहेको उल्लेख गर्दै मन्त्री गहतराजले त्यसको आधार तयार गर्न खेलकुद विश्वविद्यालय सञ्चालनका लागि सम्भाव्यता अध्ययन भइरहेको जानकारी दिनुभयो ।

अन्तर्राष्ट्रिय सम्बन्ध स्थापित गर्ने भरपर्दाे माध्यमका रूपमा खेलकुदलाई हेरिने गरेता पनि राज्यले खेल क्षेत्रलाई उपेक्षा गर्दै आएको उहाँको गुनासो थियो । “राज्यले कूल बजेटको ०.१६ प्रतिशत बजेट मात्र युवा तथा खेल क्षेत्रका लागि छुट्याएको छ”, मन्त्री गहताजले भन्नुभयो, “यसैबाट सबै प्रशासनिक तथा खेल पूर्वाधार निर्माणका काम गर्नुपर्छ, अनि कसरी हुन्छ खेल क्षेत्रको विकास ।”
 
खेलकुदलाई उद्योगका रूपमा विकास गर्नु अपरिहार्य रहेको उहाँको भनाइ छ । ललितपुरको सातदोबाटोस्थित प्रिमियर अन्तर्राष्ट्रिय विद्यालयको हाताभित्र शनिबारदेखि तीनदिने विद्यालय खेलकूद शिक्षक तालिम सञ्चालन गरिएको छ ।