फेवाताल सिमानामा गाडियो एक हजार ५५ सीमा स्तम्भ

पोखरा । फेवातालको पुनः सीमाङ्कन पश्चात् सीमा स्तम्भ गाड्ने कार्य सम्पन्न भएको छ । पोखरा महानगरपालिका, गण्डकी प्रदेश र नेपाल सरकारको संयुक्त पहलमा ताल घरमा सीमा स्तम्भहरू गाड्ने काम सम्पन्न भएको हो । 

ताल घरको सिमानामा एक हजार ५५ डिजिटल सीमा  स्तम्भ गाडिएको पोखरा उपत्यका नगर विकास समितिका कार्यालय प्रमुख प्रकाश सुवेदीले जानकारी दिए । उनका अनुसार छ सय ११ सिमेन्टेड (कंक्रिटका) सीमा स्तम्भ गाडिएको छ । 

फेवाताल संरक्षणका सम्बन्धमा सम्मानित सर्वोच्च अदालतको आदेशानुसार महानगरपालिकाले सम्बद्ध निकायसँग समन्वय गरी थप कार्य गर्दै जाने नगर प्रमुख धनराज आचार्यले बताएका छन् ।

फेवाताल संरक्षणका सम्बन्धमा एक ऐतिहासिक कार्य महानगरपालिकाको अगुवाइमा भएको र यस कार्यमा प्रत्यक्ष वा अप्रत्यक्ष रुपमा संलग्न भएर साथ र सहयोग गर्ने सम्वद्ध सबै निकायप्रति उनले आभारसमेत व्यक्त गरेका छन् ।

करिब ४५ दिनको समयावधिमा तालको सिमांकन कार्यमा खटिएका प्रााविधिक, कर्मचारी, नगर प्रहरी, नेपाल प्रहरी, सशस्त्र प्रहरी लगायत सम्बद्ध सबैपक्षलाई उनले धन्यवाद समेत दिए । 

पहिलो चरणमा ताल घरमा सीमा स्तम्भ गाड्ने र दोस्रो चरणमा थप कामको सुरुवात गर्ने महानगरपालिकाको योजना छ । 

तालको ६दशमलव३४३ वर्ग किलोमिटर क्षेत्रफलको चार किल्लामा एक हजार ५५ सीमा स्तम्भ गाडिएका छन् । यसले पोखराको पर्यावरण, प्राकृतिक सम्पदा र सांस्कृतिक पहिचान जोगाउन ऐतिहासिक महत्व राख्ने विश्वास गरिएको छ । महानगरले सीमा स्तम्भ राख्न शुरु गर्न थालेसँगै स्थानीयले दुःखेसो गर्दै निर्णय खारेज गर्न माग गरेका छन् ।