विपिन जोशीको शव नेपाल ल्याउने प्रक्रिया शुरु भयो- परराष्ट्र मन्त्रालय

काठमाडौँ । परराष्ट्र मन्त्रालयले विपिन जोशीको शव नेपाल ल्याउने प्रक्रिया शुरु भएको जानकारी दिएको छ ।

विपिन जोशीको मृत्यु भएको पुष्टि भएको उल्लेख गर्दै परराष्ट्र मन्त्रालयले नेपाली राजदूतावासका प्रतिनिधिले आज तेल अविवस्थित नेशनल सेन्टर फर फोरेन्सिक मेडिसिनको भ्रमण गरी थप पुष्टि गरेको उल्लेख गर्दै नेपाली राजदूतावासले इजरायलका सम्बन्धित निकायहरूसँग समन्वय गरी शव नेपाल पठाउने प्रक्रिया शुरू गरेको बताएको छ ।

त्यस्तै आज अपरान्ह परराष्ट्र सचिव अमृत बहादुर राईले इजरायलको परराष्ट्र मन्त्रालयका समकक्षी डाइरेक्टर जनरल महामहिम  एडन बर तालसँग टेलिफोन कुराकानीमा तालले विपिन जोशीको दु:खद निधन भएको औपचारिक जानकारी गराउँदै इजरायल सरकारको तर्फबाट मृतकप्रति श्रद्धान्जली ब्यक्त गर्दै निजको परिवार, नेपाल सरकार र नेपाली जनताप्रति गहिरो समवेदना प्रकट गरेको मन्त्रालयले उल्लेख गरेको छ ।

७ अक्टोबर २०२३ देखि प्यालेस्टिनी समूह हमासको कब्जामा रहेका इजरायलको लर्न एण्ड अर्न कार्यक्रममा सहभागी नेपाली विद्यार्थी विपिन जोशीको सकुशल रिहाइका लागि नेपाल सरकारले विगत २ बर्षको अवधिमा विभिन्न तहबाट यथासम्भव सबै किसिमका प्रयासहरु गरेको बताउदै मन्त्रालयले विपिन जोशीको मृत्युको खबरले स्तब्ध भएको बताएको छ ।

विपिन जोशीको शव नेपाल ल्याइसकेपश्चात पनि निजको मृत्युको वास्तविक कारण र परिस्थितिका सम्बन्धमा सम्बन्धित सरकार तथा सरोकारवालाहरुसँगको सहयोग र समन्वयमा सत्यतथ्य पत्ता लगाउन, न्याय दिलाउन र निजको परिवारले पाउने सामाजिक सुरक्षा, क्षतिपूर्ति, बीमा, सुविधा आदिको लागि उचित पहल जारी राखिने मन्त्रालयले जनाएको छ ।