काठमाडौँका विद्यालय सोमबारदेखि खुल्ने, विद्यार्थीलाई मनोसामाजिक परामर्श दिएर अध्यापन गराउन निर्देशन

काठमाडौँ । काठमाडौँ महानगर भित्रका विद्यालय सोमबारदेखि खुल्ने भएका छन् । महानगरले एक सुचना प्रकाशित गर्दै शिक्षकहरुलाई आइतबार विधालयमा उपस्थित हुन र सोमबारदेखि अध्ययन सुचारु गर्ने जानकारी दिएको हो ।

महानगरले अभिभावकले आफ्ना विद्यार्थी विद्यालयमा ल्याउने लैजाने गरी जिम्मा लिएमा र परिस्थिति पनि सामान्य देखिएमा त्यस्ता विद्यार्थीलाई सोमबार देखि विद्यालयमा ल्याई मनोसामाजिक परामर्श सँगसँगै अध्ययन अध्यापन गर्ने गराउन निर्देशन दिएको हो ।

साथै महानगरले सबै शिक्षक तथा कर्मचारीहरु आईतवारदेखि विद्यालयमा उपस्थित हुने, तर उक्त दिन विद्यार्थीलाई विद्यालयमा नबोलाउने,विद्यालयमा उपस्थित भई विद्यालयको प्रशासनिक कार्यका साथै सरसफाई सम्बद्ध कार्यहरु गर्ने, विद्यालयमा कुनै प्रकारको क्षति देखिएमा काठमाडौँ महानगरपालिकामा सोको विवरण उपलब्ध गराउने, विद्यार्थीका अभिभावकहरुसँग सम्पर्क गरी विद्यार्थीको अवस्था बुझ्ने, अवस्था सामान्य नहुन्जेल आफ्ना बालबालिकालाई विद्यालयमा ल्याउन र लैजाने कार्य गर्न अनुरोध गर्न आग्रह गरेको छ । 

साथै महानगरले विद्यालयमा अभिभावकसँग आउन र जान नसक्ने विद्यार्थीलाई भर्चुअल क्लासमार्फत सहजिकरण गर्न समेत आग्रह गरेको छ ।