नक्कली कम्पनी खडा गरेर २३ करोडभन्दा बढीको वित्तीय डकैती: हिमालयन रि-इन्स्योरेन्स प्रकरणमा भट्ट, गोल्छा र सिलवालसहित २० जना यसरी परे फन्दामा

ई संचार पाटी
काठमाडौँ, २२ असोज । हिमालयन रि-इन्स्योरेन्सको अर्बौँ रुपैयाँ अपचलन गरी सम्पत्ति शुद्धीकरण गरेको अभियोगमा व्यवसायी दीपक भट्ट, नेपाल उद्योग वाणिज्य महासंघका पूर्वअध्यक्ष शेखर गोल्छा, र नेपाल बिमा प्राधिकरणका तत्कालीन अध्यक्ष सूर्यप्रसाद सिलवालसहित २० जनाविरुद्ध काठमाडौँ जिल्ला अदालतमा मुद्दा दायर भएको छ। प्रहरीको केन्द्रीय अनुसन्धान ब्युरो (सीआईबी) र सम्पत्ति शुद्धीकरण अनुसन्धान विभागको प्रतिवेदनका आधारमा जिल्ला सरकारी वकिल कार्यालय काठमाडौँले अभियोगपत्र दर्ता गराएको हो। प्रतिवादीहरूबाट कुल २३ करोड ९२ लाख ५ हजार ६४ रुपैयाँ १० पैसा बिगो र सो बराबरको जरिवाना तथा कैद सजाय माग गरिएको छ।

अपराधको शैली र मुख्य कसुर

व्यवसायी दीपक भट्टले सासू अञ्जना नेपालको नाममा 'एलियन्ट इन्स्योरेन्स ब्रोकर्स' नामक नक्कली कम्पनी खडा गरी हिमालयन रि-इन्स्योरेन्सबाट २८ करोड रुपैयाँ पेस्की लिएको देखाइएको थियो। तर जीवन बिमा कम्पनीहरूले एलियन्टसँग कुनै कारोबार नै नभएको पुष्टि गरेपछि खर्च फर्जी भएको खुलेको छ। उक्त रकम विभिन्न चरण पार गर्दै मुख्य अभियुक्तको खातामा पुर्‍याइएको अभियोगपत्रमा उल्लेख छ। 

अर्बौँको शंकास्पद कारोबार र लेयरिङ

अनुसन्धान प्रतिवेदन अनुसार, हिमालयन रि-इन्स्योरेन्स स्थापनाको समयदेखि नै गैरकानुनी स्रोतबाट संकलित रकम शुद्धीकरण गर्ने माध्यम बनाइएको खुलेको छ। व्यवसायी दीपक भट्टले विभिन्न समूह तथा जगदम्बा स्टिल जस्ता कम्पनीले बैंकबाट लिएको व्यावसायिक कर्जा रकमको समेत दुरुपयोग गरी हिमालयन रि-इन्स्योरेन्सको संस्थापक सेयरमा लगानी गरेका थिए। 

तत्कालीन अध्यक्ष शेखर गोल्छाले संस्थाको २ अर्ब ७३ करोड ३३ लाख १५ हजार १६० रुपैयाँ र आफ्नो व्यक्तिगत ५२ करोड ५० लाख रुपैयाँ अवैध रूपमा सेयर बजारमा परिचालन (इन्साइडर ट्रेडिङ) गर्न सहयोग पुर्‍याएको अभियोगपत्रमा उल्लेख छ। उक्त रकमलाई लुकाउन र वैध देखाउनका लागि नक्कली कम्पनी र लेयरिङ (तहगत कारोबार) विधिको प्रयोग गरिएको दाबी गरिएको छ।

नियामक निकायका प्रमुख सिलवालमाथि गम्भीर आरोप

यस प्रकरणमा सबैभन्दा गम्भीर मोड तब आयो जब देशको बिमा क्षेत्रको नियामक निकाय 'नेपाल बिमा प्राधिकरण'का तत्कालीन अध्यक्ष सूर्यप्रसाद सिलवाल नै यस वित्तीय अपराधमा मतियार बनेको प्रमाणित भयो। सिलवालमाथि पुनर्बिमा दलालसम्बन्धी निर्देशिका, २०७८ विपरीत 'एलियन्ट इन्स्योरेन्स'लाई गैरकानुनी रूपमा इजाजत दिएको आरोप छ। 

नियामकको प्रमुख पदमा बसेर वित्तीय अपराध र गैरकानुनी धनलाई वैधता दिन भूमिका खेलेको भन्दै सरकारी पक्षले सिलवालविरुद्ध २ करोड ४० लाख रुपैयाँ बिगो कायम गरी कैद तथा जरिवानाको माग गरेको छ।

कुन आरोपीको कस्तो संलग्नता र बिगो दाबी?

मर्सिडिज–बेन्जसहितका सम्पत्ति जफत गर्न माग

सरकारी दाबी अनुसार मुख्य अभियुक्तहरूलाई सहयोग गर्ने फक्स ट्राभल एण्ड टुर्सका सञ्चालक मनोज कुमार अग्रवालको नाममा खरिद गरिएको मर्सिडिज–बेन्ज कार समेत गैरकानुनी रकमबाट जोडिएको हुँदा जफत गर्न माग गरिएको छ। यस्तै एलियन्ट इन्स्योरेन्सकी संस्थापक अञ्जना नेपाल, आयुष्मा नेपाल भट्ट र सीईओ सुधीर कुमार मल्लिकविरुद्ध २३ करोड ९२ लाख ५ हजार ६४ रुपैयाँ बिगो कायम गरिएको छ। अर्की संस्थापक मृदुला सरियाले पछि रकम फिर्ता गरे पनि अपराधमा संलग्ता देखिएको भन्दै २१ करोड १५ लाख रुपैयाँ बिगो कायम गरी दोब्बर जरिवाना माग गरिएको छ। 

कुल ६ अर्बभन्दा बढीको शंकास्पद कारोबार जोडिएको यस वित्तीय अपराधको संवेदनशीलतालाई हेर्दै सीआईबी र सम्पत्ति शुद्धीकरण अनुसन्धान विभागले थप अन्य ५६ जना प्रतिवादीहरूको बैंक खातासमेत रोक्का गरिसकेको छ। यो मुद्दा अदालतको इतिहासमा संगठित वित्तीय अपराध र नीतिगत भ्रष्टाचारको एउटा ठुलो नमुना बन्ने विश्लेषकहरूको भनाइ छ।