खरिपाटी होल्डिङ सेन्टरमा सुकुमवासीको आन्दोलन: "खाना नदिएर सरकारले रातभर भोकै राख्यो"

काठमाडौं, २३ असार । भक्तपुरको खरिपाटीस्थित नेपाल विद्युत प्राधिकरणको तालिम केन्द्रमा रहेका सुकुमवासीहरू सोमबार साँझदेखि खाना नपाएको भन्दै विरोध प्रदर्शनमा उत्रिएका छन् । सरकारले वैकल्पिक व्यवस्था र राहतबिना नै खाना रोकेको र कार्यतालिका अगावै निकाल्न खोजेको भन्दै उनीहरू आन्दोलित भएका हुन् ।

रातभर भोकै, बालबालिका र वृद्धवृद्धा बढी मर्कामा

सोमबार बिहानसम्म नियमित खाना पाइरहेका सुकुमवासीहरूलाई साँझदेखि खानाको व्यवस्था नगरिएको बुझिएको छ । होल्डिङ सेन्टरमा आश्रित एक सुकुमवासीका अनुसार, खाना नदिएपछि उनीहरू रातभर भोकै बस्न बाध्य भएका थिए । उपाय नलागेपछि उनीहरूले आज (मंगलबार) बिहानैदेखि केन्द्र परिसरमा नाराबाजी र विरोध सुरु गरेका हुन् ।

संयुक्त राष्ट्रिय सुकुमवासी मोर्चाका उपाध्यक्ष पवन गुरुङले हिजो बिहानसम्म खाना खाएर आफूहरू काम विशेषले निस्किएको तर साँझदेखि एकाएक खाना रोकिएको जानकारी दिए ।

आन्दोलनमा उत्रिएका अर्का सुकुमवासीले आक्रोश पोख्दै भने:

"सरकार आफैंले होल्डिङ सेन्टरमा बस्न दिएको अवधिसम्म पनि हामीलाई भोकै राख्यो । हामी त जसोतसो सहौंला, तर यहाँ भएका बिरामी, पाका उमेरका वृद्धवृद्धा र साना बालबालिकाहरूको बिजोग भएको छ । कतिपयले खाना खाएर खानुपर्ने औषधि समेत खान पाएका छैनन् ।"

म्याद सकिनु अगावै दबाब

अधिकार सम्पन्न वाग्मती सभ्यता एकीकृत विकास समितिले आगामी असार २४ गतेभित्र होल्डिङ सेन्टर खाली गर्न निर्देशन दिएको थियो । तर, तोकिएको म्याद (असार २४ गते) नसकिँदै २४ घण्टा अगावै खाना बन्द गरेर सरकारले आफूहरूलाई जबरजस्ती निकाल्न खोजेको आरोप सुकुमवासीहरूको छ ।

गत वैशाख महिनामा काठमाडौंको बाग्मती र मनोहरा नदी किनारका अनधिकृत बस्तीहरू खाली गराउने क्रममा सरकारले यी परिवारहरूलाई उद्धार गरी विभिन्न होल्डिङ सेन्टरहरूमा स्थानान्तरण गरेको थियो । हाल खरिपाटीस्थित केन्द्रमा मात्रै ९९ परिवारका २०७ जना आश्रित छन् ।

राहत अस्वीकार, सम्मानजनक पुनर्स्थापनाको माग

यसअघि सरकारले प्रतिपरिवार २५ हजार रुपैयाँ राहत दिएर ५ दिनभित्र होल्डिङ सेन्टर खाली गर्न सूचना जारी गरेको थियो । तर, सुकुमवासीहरूले उक्त न्यून रकमले काठमाडौं उपत्यकामा कोठा भाडामा लिन र गुजारा गर्न असम्भव रहेको भन्दै राहतका लागि निवेदन दिन अस्वीकार गरेका छन् । उनीहरूले आफूहरूलाई अल्मल्याउने राहत भन्दा पनि दीर्घकालीन र सम्मानजनक पुनर्स्थापना हुनुपर्ने अडान राख्दै आएका छन् ।

सुरक्षा व्यवस्था कडा

सुकुमवासीहरूले सामूहिक रूपमा विरोध र नाराबाजी गर्न थालेपछि खरिपाटीस्थित तालिम केन्द्र वरपरको सुरक्षा व्यवस्था कडा पारिएको छ । सम्भावित झडप वा अप्रिय घटना हुन नदिन अहिले उक्त क्षेत्रमा ठूलो संख्यामा नेपाल प्रहरी र सशस्त्र प्रहरी बलका सुरक्षाकर्मीहरू परिचालन गरिएको छ ।