श्रम काउन्सिलरले दर्जनौँ श्रमिक हरु को उजुरी लुकाएको आरोप, र अनियमितता गरेको आरोपमा युएई बाट नेपाल फिर्ता बोलाइयो

दुबई । युएई, स्थित आबुधाबीमा रहेका नेपाली राजदूतावासका श्रम काउन्सुलर दिपेन्द्र पौडेलले दर्जनौं श्रमिकहरु ले दिएको उजुरी लुकाएको तथ्य खुलेपछि श्रममन्त्रालयले छानविन प्रक्रिया सुरु गरेको हो । 

एकजना पाकिस्तानी ले स्क्याम मा पारेर सर्लाहीका रन्जित कुमार महतो लाई आर्थिक चलखेल गरेको झुठो आरोपमा दुबई पुलिसले हिरासत मा लिएर राखेको र परिवारले अवस्था बुझिदिन पटकपटक काउन्सिलर दिपेन्द्र पौडेल लाई आग्रह गर्दा पनि महिनौ झुलाएर बेवास्ता गरेको पिडितले बताए ।

कैयौं पिडित नेपाली श्रमिकहरूले दूतावासमा दिएका उजुरीहरू दर्ता नै नगरी, अभिलेखमा भएका उजुरीको समेत समाधान नगरी उजुरी लुकाएको, श्रमिकको उद्धार तथा शव व्यवस्थापनमा समेत अनियमितता गरेको पाएपछि श्रम, रोजगार तथा सामाजिक सुरक्षा मन्त्रालय तथा परराष्ट्र मन्त्रालयले संयुक्त रूपमा छानबिन अघि बढाएका छन्।

उजुरीकर्ताहरूले बताएअनुसार श्रमिकहरूले समयमै जानकारी गराइएका समस्याहरू, तलब रोकिने, काम ठप्प पारिने, रोजगारदातासँग विवाद, कानुनी सहायता नपाइने, तथा अन्य श्रम उजुरीहरू दूतावासमा दर्ता नगरी लुकाएको आरोप छ। 

कामदारहरूको समस्यामा दूतावासले प्रभावकारी भूमिका ननिभाएका कारण उजुरीहरू सम्बन्धित निकायसम्म पुग्न नसकेको उजुरीकर्ताहरूले बताएका |  पौडेल गत वर्ष कार्तिकमा श्रम काउन्सुलरको रुपमा नियुक्त भएका थिए।

पौडेलमाथि गम्भीर प्रश्न उठेपछि श्रम मन्त्रालय, परराष्ट्र मन्त्रालय तथा दूतावासले संयुक्त रूपमा आन्तरिक छानबिन कार्यदल गठन गरी उजुरी दर्ता, व्यवस्थापन तथा प्रतिवेदन प्रकृयाको समग्र समीक्षा सुरु गरेका छन्। मन्त्रालय स्रोतका अनुसार अब केस दर्ता प्रणाली पारदर्शी बनाउन, श्रमिक उजुरीलाई दूतावासबाट अनुगमन तथा समाधान प्रक्रियामा छिटो समावेश गर्न नयाँ प्रोटोकल तयार गर्न पहल भइरहेको छ।

‘हामी समस्यामा परेको बेलामा सहयोग नपाउँदा थप पीडामा छौँ, उजुरी लिएर जादा कामदारसँग हात मिलाउदा हात गन्हाउछ भन्दै तर्किने श्रम काउन्सुलर फिर्ता बोलाएको सुनेर खुसी लाग्यो , हाम्रो उजुरीको सुनुवाई भएको छ’ समस्यामा परेका एक नेपालीले भने, यस विषयमा दूतावासका अधिकारीहरूले भने आफ्नो धारणा सार्वजनिक गरेका छैनन्। तर मन्त्रालय तहबाट छानबिन सुरु भइसकेकाले मन्त्रालयको निर्देशनअनुसार श्रम काउन्सुलर पौडेललाई फिर्ता बोलाइएको दूतावासले जनाएको छ।

मन्त्रालय स्रोतका अनुसार पौडेलको विषयमा यसअघि पनि सरकारका मुख्य सचिव, श्रम सचिव तथा परराष्ट्र र श्रम मन्त्रालयमा उजुरी परेका थिए। गम्भीर प्रश्न उठेपछि मन्त्रालयले उनलाई यूएईबाट रमाना गरी फिर्ता बोलाएर मन्त्रालयमा तानेको हो। उनी शनिबार नेपाल फर्किएका छन्।

समस्यामा परेका श्रमिकहरूको उजुरी व्यवस्थापन नगर्ने, म्यानपावर कम्पनीहरूसँग उठबस गरी कामदार मागपत्रमा अनियमितता गर्ने तथा अन्य गम्भीर विषयमा उजुरी परेपछि सरकारले यो निर्णय गरेको परराष्ट्र मन्त्रालय स्रोतले जनाएको छ।