क्रान्तिकारी कम्युनिष्ट पार्टीहरूलाई ध्रुवीकृत गर्दै देशको नेतृत्व सम्हाल्ने विप्लवको चाहना

काठमाडौं । नेकपाका महासचिव नेत्रविक्रम चन्द विप्लवले एक पटक नेपालको नेतृत्व सम्हालेर देशको सेवा गर्ने चाहना रहेको बताएका छन्। काठमाडौंको कमलादीस्थित प्रज्ञा भवनको डबलीमा शनिबार आयोजित पार्टी प्रवेश कार्यक्रमलाई सम्बोधन गर्दै उनले क्रान्तिकारी कम्युनिष्ट पार्टीहरूलाई ध्रुवीकृत गर्दै देशको नेतृत्व सम्हाल्ने चाहना रहेको उनले बताएका हुन्।

कांग्रेस, एमाले र माओवादी केन्द्रले पटक-पटक सरकारको नेतृत्व गर्दा पनि जनअपेक्षा पूरा गर्न नसकेले अब नेकपाले देशको नेतृत्व गर्नुपर्ने उनले बताए। ‘हामी नेकपाले पनि ध्रुवीकरण गर्दै देशको नेतृत्व गर्न चाहन्छौं। एकचोटी यो देशको नेतृत्व र सेवा गर्ने चाहना नेकपाको हो,’ उनले भने।

मोहन वैद्य नेतृत्वको क्रान्तिकारी कम्युनिष्ट पार्टीका नेता जितेन्द्र दाहाल विप्लव नेतृत्वको पार्टीमा प्रवेस गरेका छन्। ‘हाम्रो केन्द्रीय समितिको बैठकबाट ध्रुवीकरणको जो निर्णय थियो, त्यो निर्णयको पहिलो कदमको रुपमा यो प्रज्ञाभवनको डबलीमा सुरु भएको छ। यस्ता ध्रुवीकरण फेरि पनि हुने छन्। यो सुरुवात हो,’ उनले भने।

माओवादी केन्द्रले पनि ध्रुवीकरणको कुरा गरिरहेको भन्दै उनले तीनपटक सरकारको नेतृत्व र पटक–पटक सत्तामा पुगेको माओवादी केन्द्रले अब जनतालाई के दिनसक्छ भन्ने जिज्ञासा रहेको बताए।