हृदयाघात भएपछि पूर्वयुवराज पारस शाहको नर्भिकको आइसीयुमा उपचार हुँदै

काठमाडौं । पूर्वयुवराज पारस शाहको थापाथलीस्थित नर्भिक अस्पतालको आइसीयूमा राखेर उपचार जारी छ। आइतबार राति हृदयाघात भएपछि उनलाई अस्पताल लगिएकोमा मुटुमा स्टेन राखिएको अस्पतालले जनाएको छ।

डाक्टर यादव भट्टको टिम पारसको उपचारमा संलग्न रहेको नर्भिक अस्पतालका प्रवक्ता अजय मिश्राले बताए। पारसको आइसीयूमा उपचार भइरहे पनि स्वास्थ्य स्थिति सुधारोन्मुख रहेको उनको भनाइ छ।

पारस शाहलाई यो चौथो पटक हृदयाघात भएको हो। पूर्वराजा ज्ञानेन्द्रका सहयोगी सागर तिमिल्सिनाका अनुसार पनि पूर्वयुवराजको स्वास्थ्यवस्था सुधारोन्मुख छ। उनका अनुसार गएराति नै मुटुमा स्टेन लगाएको र अहिले अवस्था सुधारोन्मुख रहेको छ । पारसलाई चौथो पटक हृदयघात भएको हो । यसअघि उनमा २०७५ माघ महिनामा हृदयघात भएको थियो । त्यतिबेला पनि उनको नर्भिकमै उपचार भएको थियो ।