ओली, गगनलगायतको नाम लिँदै ‘आवर डाइनामिक टिम’ भनेर ठगी गर्ने अमेरिकी नागरिक पक्राउ

काठमाडौं । एमाले अध्यक्ष केपी शर्मा ओलीलगायतका नेताहरूको नाम दुरुपयोग गरी ठगी गरेको आरोपमा एक अमेरिकी नागरिक पक्राउ परेका छन् । पूर्वप्रधानमन्त्री समेत रहेका ओली, आरजु राणा देउवा, गगन थापा, महेश बस्नेत, विनोद चौधरीलगायत १३ जना नेताहरूको नाममा ठगी गरेको पाइएपछि अध्यागमन कार्यालयले ती व्यक्तिलाई पक्राउ गरेर अनुसन्धान अघि बढाएको छ ।

अन्तराष्ट्रियस्तरमा फन्ड उठाउने उद्देश्यले कलेजको वेभसाइटमा विभिन्न दलका नेताहरूलाई ‘आवर डाइनामिक टिम’ भनेर नाम उल्लेख गरी परिचयको दुरुपयोग गरेको अध्यागमनले जनाएको छ । त्यसैगरी लाइब्रेरी, क्याम्पस सर्भिस तथा प्रशासनिक टिम भनेर अन्य प्रतिष्ठित नेपालीहरूको समेत नाम उल्लेख गरेको अनुसन्धानमा खुलेको छ ।

सो कलेजले अध्यापन गराउने विषयहरू कोरियन स्टडिज, एआइ सफ्टवेयर इन्जिनियरिङ्, बिजनेस् स्टडिज आदि देखाइएको कलेजको वेभसाइटमा उल्लेख छ । सन् २०१४ देखि विभिन्न प्रयोजनका लागि नेपाल आवतजावत गरेका उनले करिब १२ वर्षको अवधीमा ५० भन्दा बढीपटक नेपाल भ्रमण गरेका छन् । ति अमेरिकी नागरिक पर्यटक, वर्किङ्, व्यावसायिक लगायतका भिसामा नेपाल बस्ने गरेको पाइएको छ । 

प्रारम्भिक अनुसन्धानअनुसार योङघोले  अध्यापन गराउने बहानामा क्रिश्चियन धर्म प्रचारमा संलग्न रहेको देखिएको छ । उनले ‘कमसीड नेपाल प्रा.लि.’ नामक कम्पनी स्थापना गरी त्यसकै आवरणमा चर्च प्लान्टिङलगायत गतिविधि गरेको विभागको भनाइ छ ।

सन् २००८ मा न्यूयोर्कमा ‘यस इन हिम चर्च’ स्थापना गरी ‘द प्लान्टर’ नामक संस्थामार्फत चर्च विस्तार गरेको तथा सोही कोरियन मिसनरी संस्थामार्फत नेपालमा कोरियन भाषा विद्यालय खोल्ने योजना सार्वजनिक गरेको पनि अनुसन्धानबाट खुलेको छ । ललितपुरको सानेपामा ‘नेपालको पहिलो क्रिश्चियन कलेज’ खोल्ने भन्दै वेबसाइट तयार गरी प्रचार–प्रसार गरिएको पाइएको विभागले जनाएको छ ।