सुनसरीको कप्तानगन्जमा तनाव: कर्फ्यु उल्लंघन गर्दै प्रदर्शन, पूर्व–पश्चिम राजमार्ग अवरुद्ध

 विराटनगर / इनरुवा — सुनसरीको देवानगन्ज गाउँपालिका–३ कप्तानगन्जमा दुई समूहबीच भएको झडप र प्रहरीको गोलीबारीपछि सोमबार क्षेत्र तनावग्रस्त बनेको छ। स्थानीय प्रशासनले जारी गरेको कर्फ्यु (निषेधाज्ञा) उल्लंघन गर्दै स्थानीयबासी र प्रदर्शनकारीहरू बिहानैदेखि सडकमा ओर्लिएका छन्।

प्रदर्शनकारीहरूले सुनसरी सदरमुकाम इनरुवा बजारका साथै लौकही र आसपासका क्षेत्रमा टायर बालेर प्रदर्शन गर्दा पूर्व–पश्चिम राजमार्ग पूर्ण रूपमा अवरुद्ध भएको छ। राजमार्ग ठप्प भएपछि सयौँ सवारी साधन र यात्रुहरू बिच बाटोमै रोकिएका छन्। स्थानीय प्रशासन र प्रहरीका अनुसार साउनको सोमबारका लागि आयोजित ‘बोलबम’ यात्राको पूर्वसन्ध्यामा आइतबार राति ९:०० बजेतिर डिजे (DJ) बाजा बजाउने विषयमा विवाद सुरु भएको थियो।

कपाल/गाउँ हुँदै कोशी ब्यारेजबाट जल ल्याउन जाने क्रममा उच्च आवाजमा डिजे बजाएपछि अर्को पक्षका स्थानीयले रातिको समयमा आवाज सानो बनाउन आग्रह गरेका थिए। सोही विषयमा दुई समूहबीच सामान्य भनाभनबाट सुरु भएको विवादले उग्र रूप लिँदै ढुङ्गामुढा, तोडफोड र दोहोरो झडपको स्थिति सिर्जना भएको हो।

 स्थिति नियन्त्रण बाहिर जान लागेपछि सुरक्षाकर्मी (सशस्त्र प्रहरी बल) ले चलाएको गोली लागेर ३० वर्षीय ओमप्रकाश मेहता (देवानगन्ज–४) को उपचारका क्रममा मृत्यु भएको छ। दोहोरो झडप र प्रहरी कारबाहीका क्रममा सर्वसाधारण र सुरक्षाकर्मी गरी २२ जनाभन्दा बढी घाइते भएका छन्।

घाइते हुनेहरूमा इलाका प्रहरी कार्यालय देवानगन्जका प्रमुख प्रहरी निरीक्षक (इन्स्पेक्टर) राकेश राई सहित १३ जना सुरक्षाकर्मी (८ नेपाल प्रहरी र ५ सशस्त्र प्रहरी) र ९ जना सर्वसाधारण रहेका छन्।इन्स्पेक्टर राईको टाउकोमा गम्भीर चोट लागेकाले ५ वटा टाँका लगाइएको छ।

घाइते सर्वसाधारणहरूको विराटनगरस्थित न्युरो अस्पताल, कोशी अस्पताल र बिराट नर्सिङ होममा उपचार भइरहेको छ। झडपपछि स्थिति उग्र बन्दै गएकाले जिल्ला प्रशासन कार्यालय सुनसरीले कप्तानगन्ज, इनरुवा, लौकही, भूताहा र हरिनगरा लगायतका दक्षिणी क्षेत्रका बजारहरूमा अनिश्चितकालीन कर्फ्यु आदेश जारी गरेको छ।

तथापि, स्थानीयले कर्फ्युको पर्वाह नगरी सडकमा प्रदर्शन जारी राखेका छन्। अवस्थालाई नियन्त्रणमा राख्न र थप अप्रिय घटना हुन नदिन नेपाल प्रहरी र सशस्त्र प्रहरी गरी भारी संख्यामा सुरक्षाकर्मी परिचालन गरिएको छ।

घटनापछि गृह मन्त्रालयले परिस्थिति समीक्षाका लागि सुरक्षा निकायका प्रमुखहरूसँग छलफल गर्नुका साथै घटनाको सत्यतथ्य छानबिन गर्न ५ सदस्यीय छानबिन समिति गठन गरेको छ। जिल्ला प्रशासन कार्यालयले सर्वसाधारणलाई कुनै पनि अफवाहको पछाडि नलग्न, संयमता अपनाउन र घरभित्रै रहन अपिल गरेको छ।