यूईएफए नेशन्स लिग : जर्मनीले बोस्नियालाई ७ गोलले हरायो

काठमाडौं ।  यूईएफए नेसन्स लिगमा जर्मनीले बोस्नियालाई सात गोलले हराएको छ । टिम क्लेनडिनेस्ट र फ्लोरिन विर्टजको दुई/दुई गोलमा जर्मनीले सात गोलको फराकिलो जित निकालेको हो । प्रतियोगिताको छ वर्षको इतिहासमा यो अहिलेसम्मको सबैभन्दा ठूलो अन्तरको जितसमेत हो । जितसँगै जर्मनीले एक खेल अगाडि नै लिग–ए ग्रुप–थ्री जित्ने निश्चित भएको छ ।

जर्मनी यसअघि नै प्रतियोगिताको क्वाटरफाइनल पनि पुगिसकेको छ । समूहकै अर्को खेलमा नेदरल्यान्ड्सले हङ्गेरीलाई ४–० ले पराजित गर्‍यो । जितसँगै नेदरल्यान्ड्सले अर्काे चरण पुग्ने सम्भावना बलियो बनेको छ । लिग–बी ग्रुप–वानमा जर्जिया र युक्रेनले एक/एक गोलको बराबरी तथा अल्बानिया र चेक गणतन्त्रले गोलरहित बराबरी खेलेका छन् ।