चुनदेवी भर्सेस सानेपा लडाइँ उग्र बन्दै: गगन थापाले देउवाका सहयोगीहरूलाई भने- ‘विगतमा पनि डुबायौ, फेरि पनि डुबाउँदै छौ’

काठमाडौँ — नेपाली कांग्रेसका सभापति गगन थापाले निवर्तमान सभापति शेरबहादुर देउवालाई आफ्नै निकटस्थहरूबाट सतर्क रहन गम्भीर चेतावनी दिएका छन्। ललितपुरको सानेपास्थित पार्टी केन्द्रीय कार्यालयमा जारी केन्द्रीय समिति बैठकलाई सम्बोधन गर्दै थापाले देउवाका सहयोगीहरूले नै उनलाई विगतमा डुबाएको र भविष्यमा पनि त्यस्तै गर्न सक्ने टिप्पणी गरेका हुन्।

देउवा समूहको तीन दिने भेलामा आफ्नो चर्को आलोचना भएपछि सभापति थापाले सानेपाबाट त्यसको एक-एक जवाफ फर्काएका हुन्।
देउवाका वरिपरि बस्ने मानिसहरूले उनलाई गलत सूचना दिएर विगतमा पनि डुबाएको र फेरि पनि डुबाउने खेल भइरहेको थापाको दाबी छ। पछिल्लो तीन दिनमा आफ्नो जीवनकै सबैभन्दा धेरै निन्दा र आलोचना गरिएको भन्दै थापाले गुटको राजनीति गर्नेहरूलाई विधि र विधान सम्झाएका छन्। 

आगामी १५ औँ महाधिवेशनपछि देउवालाई सम्मानजनक बिदाइ गर्ने र उनलाई पार्टीको अभिभावकीय भूमिकामा देख्न चाहेको थापाले प्रष्ट पारे। असोज १६ गतेबाट पार्टीको महाधिवेशन सुरु हुने र यसमा कुनै पनि 'किन्तु परन्तु' वा बहानाबाजी स्वीकार्य नहुने उनको चेतावनी छ।

थापाको प्रहार लगत्तै सुकेधारा राष्ट्रिय भेला र सानेपा बैठकमा देउवा पक्षीय प्रभावशाली नेताहरूले थापाको कार्यशैलीमाथि गम्भीर प्रश्न उठाएका छन्:

• पूर्णबहादुर खड्का (पूर्वउपसभापति): गगन थापा नेतृत्वको समूहले एकलौटी ढंगले निर्णय गरिरहेको आरोप लगाउँदै पार्टीभित्रको 'अराजकता' का कारण कांग्रेस कमजोर बन्दै गएको टिप्पणी गरे।
• विमलेन्द्र निधि (पूर्वमहामन्त्री): विशेष महाधिवेशनको प्रक्रिया र वर्तमान कार्यसमितिको वैधतामाथि नै असन्तुष्टि जनाउँदै नेतृत्वले सबै पक्षलाई समेट्न नसकेको आरोप लगाए।
• रमेश लेखक: पार्टीलाई एकताबद्ध राख्ने कि विभाजनतर्फ लैजाने भन्ने कुरा संस्थापन पक्ष (गगन थापा समूह) को हातमा रहेको भन्दै देउवालाई कमजोर बनाउने खेलले सिंगो कांग्रेसलाई घाटा पुग्ने चेतावनी दिए।
• जितेन्द्रजंग बस्नेत र दीपक खड्का: "हामी गगन थापाका दास होइनौँ" भन्दै बीपीको विचार छाडेर पार्टी नबन्ने र नैतिकता छ भने सानेपास्थित केन्द्रीय कार्यालय खाली गर्न थापा समूहलाई खुला चुनौती दिए।

कांग्रेसभित्र चुलिएको विवादको चक्र

 के हो विवादको पृष्ठभूमि?

विशेष महाधिवेशनपछि निर्वाचन आयोग र सर्वोच्च अदालतले गगन थापा नेतृत्वको कांग्रेसलाई आधिकारिकता दिइसकेका छन्। तर, ५ महिनाको विदेश बसाइपछि नेपाल फर्केका पूर्वसभापति शेरबहादुर देउवाले चुनदेवीमा छुट्टै कार्यालय खडा गरेपछि पार्टीभित्र विवाद बढेको हो। देउवा पक्षका नेताहरूले थापाको कार्यशैलीमाथि प्रश्न उठाउँदै देशव्यापी घेराबन्दी सुरु गरेपछि कांग्रेसभित्रको आन्तरिक संघर्ष सानेपा बैठकमा उग्र रूपमा प्रकट भएको छ।