इन्जिनियर्स एसोसियसनले ध्वस्त भौतिक संरचनाको निःशुल्क प्रारम्भिक परिक्षण गर्दै

काठमाडौँ । नेपाल इन्जिनियर्स एसोसियसनले जेनजी आन्दोलनका क्रममा आगजनी र तोडफोडबाट ध्वस्त भएका संरचनाको निःशुल्क प्रारम्भिक परिक्षण शुरु गरेको छ । एसोसियसनले विद्यमान जटिल र कठिन परिस्थितिलाई गम्भीरतापूर्वक जिम्मेवारिबोध र आत्मसाथ गर्दै देशैभरि भएका क्षतिको समुचित मूल्याङ्कन तथा आवश्यक पुनर्निर्माण प्रकृयामा निःशुल्क प्राविधिक सहयोग पु-याउने प्रतिबद्धता व्यक्त गरेको छ ।

यसै सन्दर्भमा एसोसियसनले प्रारम्भिक रूपमा स्वतःस्फूर्त क्षतिग्रस्त भौतिक संरचनाहरूको र्यापिड भिजिअल ड्यामेज एसेस्मेन्ट अभियानको आइतबारदेखिनै शुरुवात गर्दै सर्वोच्च अदालत, काठमाडौ जिल्ला अदालत तथा नेपाल बार एशोसिएसनको भवनको प्रारम्भिक निरीक्षण गरी प्रारम्भ गरेको जानकारी गराएको छ । 

एसोसियसनले प्राविधिक परिक्षण पश्चात मात्र संरचना प्रयोग गर्न अनुरोध गर्दै अभियानमा क्षतिग्रस्त भौतिक संरचनाहरूको तत्काल अवलोकन, जोखिम मूल्याङ्कन, प्रयोग योग्यता जाँच, वैकल्पिक व्यवस्थापन तथा पुनर्निर्माणको संभाव्यता अध्ययन एवं मूल्याङ्कन गरिने बताएको छ । यस प्रकृयामा आवश्यक प्राविधिक जनशक्ति परिचालनका लागि इच्छुक इन्जिनियर, आर्किटेक्ट तथा संरचनात्मक विशेषज्ञ लगायत अन्य सम्बन्धित प्राविधिकहरूलाई स्वयंसेवकको रूपमा सहभागी हुन समेत आग्रह गरिएको छ ।

राष्ट्र निर्माणका लागि पेशागत दायित्वबोध गरी देश भरि गर्न लागिएको यस अभियानलाई संवन्धित निकायको साथ, सहयोग, सहकार्य र समन्वय प्राप्त भएको खण्डमा थप उर्जाका साथ निःशुल्क प्राविधिक सहयोग उपलब्ध गराउन नेपाल इन्जिनियर्स एशोसिएसन तत्पर र प्रतिबद्ध रहेको स्पष्ट गरेको छ । 

एसोसियसनले भनेको छ- 

क्षतिग्रस्त भौतिक संरचनाहरुको निःशुल्क प्रारम्भिक परिक्षणको अपिल !

२०८२ भदौ २३ र २४ गते नेपालमा भएको Gen-Z युवाहरुको आन्दोलनको दौरान मुलुकका विभिन्न शहर तथा स्थानहरुमा रहेको पुरातात्विक महत्व र ऐतिहासिक, सांस्कृतिक, सरकारी भौतिक संरचनाहरू लगायत व्यक्तिगत भवनहरूमा भएको तोडफोड, आगजनी तथा लुटपाटका घटनाले सम्पूर्ण इन्जिनियर, आर्किटेक्ट समुदायलाई स्तब्ध बनाएको छ । वि.स. १९९० र २०७२ सालमा गएको भुकम्पबाट क्षतिग्रस्त भएका भौतिक संरचनाहरूलाई नेपाली प्राविधिक जनशक्तिको परिश्रम, मेहनत, विज्ञता र दक्षताबाट पून: निर्माण गर्न ठूलो योगदान रहेको थियो भन्ने विषयमा दुईमत हुन सक्दैन । आज ती संरचनाहरूलाई आन्दोलनको नाममा विध्वंस गराइएको घटनाले सम्पूर्ण नेपाली इन्जिनियर समुदाय अत्यन्त दुःखी र चिन्तित भएको छ । नेपाल इन्जिनियर्स एशोसिएसनले यस प्रकारको अपूरणीय क्षतिलाई गम्भीरतापूर्वक लिएको र ती संरचनाहरू केवल भवन मात्र नभई राष्ट्रको इतिहास, सांस्कृतिक धरोहर, सार्वजनिक सेवा प्रणाली र सामाजिक सम्पत्तिका प्रतिक हुन भन्ने कुरा आम सचेत नेपाली नागरिकले बुझ्नु पर्दछ ।

तसर्थ विद्यमानको यो जटिल र कठिन परिस्थितिलाई गम्भीरतापूर्वक जिम्मेवारिबोध र आत्मसाथ गर्दै नेपाल इन्जिनियर्स एशोसिएसन (NEA ) ले देशैभरि भएका क्षतिको समुचित मूल्याङ्कन तथा आवश्यक पुनर्निर्माण प्रकृयामा निःशुल्क प्राविधिक सहयोग पु-याउने प्रतिबद्धता व्यक्त गर्दछ ।

यसै सन्दर्भमा एसोसियसनले प्रारम्भिक रूपमा स्वतःस्फूर्त क्षतिग्रस्त भौतिक संरचनाहरूको  अभियानको कार्य आज मिति २०८२ भदौ २९ गते सर्वोच्च अदालत, काठमाडौ जिल्ला अदालत तथा नेपाल बार एशोसिएसनको भवनको प्रारम्भिक निरीक्षण गरी प्रारम्भ गरेको व्यहोरा संबन्धित सबैमा जानकारी गराउन चाहन्छौं । साथै प्राविधिक परिक्षण पश्चात मात्र संरचना प्रयोग गर्न अनुरोध गर्दै अभियानमा क्षतिग्रस्त भौतिक संरचनाहरूको तत्काल अवलोकन, जोखिम मूल्याङ्कन, प्रयोग योग्यता जाँच, वैकल्पिक व्यवस्थापन तथा पुनर्निर्माणको संभाव्यता अध्ययन एवं मूल्याङ्कन गरिनेछ । यस प्रकृयामा आवश्यक प्राविधिक जनशक्ति परिचालनका लागि इच्छुक इन्जिनियर, आर्किटेक्ट तथा संरचनात्मक विशेषज्ञ लगायत अन्य सम्बन्धित प्राविधिकहरूलाई स्वयंसेवकको रूपमा सहभागी हुन हार्दिक अनुरोध गर्दछौं । संवेदनशील समयको माग अनुसार राष्ट्रिय हित, सम्पदा र संरचनाको संरक्षणका लागि प्राविधिक विशेषज्ञता मार्फत यस्ता संकटको सामना गर्ने क्षमता २०७२ सालको भुकम्पका बखत एशोसिएसनले खेलेको भूमिका र अनुभव हामीसँग ताजै छ, तसर्थ राष्ट्र निर्माणका लागि पेशागत दायित्वबोध गरी देश भरि गर्न लागिएको हाम्रो यस अभियानलाई संवन्धित निकायको साथ, सहयोग, सहकार्य र समन्वय प्राप्त भएको खण्डमा थप उर्जाका साथ निःशुल्क प्राविधिक सहयोग उपलब्ध गराउन नेपाल इन्जिनियर्स एशोसिएसन तत्पर र प्रतिबद्ध रहेको व्यहोरा यसै विज्ञप्ति मार्फत सार्वजनिक गर्दछौं ।