अर्जुन तेन्दुलकरले गरे इन्गेजमेन्ट

काठमाडौँ । भारतका महान क्रिकेटर सचिन तेन्दुलकरका छोरा अर्जुन तेन्दुलकरको इन्गेजमेन्ट भएको छ ।

इन्डिया टुडेको रिपोर्ट अनुसार, अर्जुनले सानिया चण्डोकसँग इन्गेजमेन्ट गरेका छन् । सानिया मुम्बईका प्रसिद्ध व्यापारी रवि घईकी नातिनी हुन् । घई परिवार आतिथ्य र खाद्य क्षेत्रमा परिचित छ, जसको इन्टरकन्टिनेन्टल होटल र आइसक्रिम ब्रान्ड ब्रुकलिन क्रिमरी छ ।

रिपोर्ट अनुसार, अर्जुन र सानियाले नजिकका साथीहरू र दुवै परिवारका सदस्यहरूको उपस्थितिमा एक निजी कार्यक्रममा इन्गेजमेन्ट गरेका छन् । यद्यपि, तेन्दुलकर र घई परिवारले अहिलेसम्म इन्गेजमेन्टको कुनै आधिकारिक घोषणा वा वक्तव्य जारी गरेको छैन ।

२५ वर्षीय अर्जुन बायाँ हाते फास्ट बलर अलराउन्डर हुन् जसले घरेलु क्रिकेटमा गोवाको प्रतिनिधित्व गर्छन् र आईपीएलमा मुम्बई इन्डियन्सबाट पनि खेल्छन् । यसअघि, उनले जुनियर स्तरमा मुम्बईको प्रतिनिधित्व गरेका थिए र भारतको अन्डर-१९ टोलीमा स्थान बनाएका थिए ।