परराष्ट्रमन्त्री शिशिर खनाल आज चीन जाँदै

काठमाडौं। परराष्ट्रमन्त्री शिशिर खनाल आज (आइतबार) उत्तरी छिमेकी मुलुक चीनको चार दिने औपचारिक भ्रमणका लागि बेइजिङ प्रस्थान गर्दैछन्।

चिनियाँ विदेशमन्त्री वाङ यीको आधिकारिक निमन्त्रणामा हुन लागेको यो भ्रमण आगामी असार ३ गतेसम्म जारी रहनेछ। हालै मात्र छिमेकी राष्ट्र भारतको औपचारिक भ्रमण सम्पन्न गरेर फर्किएका परराष्ट्रमन्त्री खनालको यो चीन भ्रमणलाई कूटनीतिक वृत्तमा विशेष चासोका साथ हेरिएको छ।

चीनस्थित नेपाली दूतावास र परराष्ट्र मन्त्रालयका अनुसार मन्त्री खनाल आजै बेइजिङ ओर्लने कार्यतालिका रहेको छ। भ्रमणको पहिलो दिन आजै साँझ ५ बजे चीनमा रहेका नेपाली समुदाय, बुद्धिजीवी तथा व्यवसायीहरूसँग मन्त्री खनालले विशेष अन्तरक्रिया गर्नेछन्।

बेइजिङस्थित नेपाली दूतावासले आयोजना गर्ने स्वागत समारोहमा सहभागी हुँदै उनले चिनियाँ व्यवसायीहरूसँग नेपालमा लगानीका सम्भावना, पर्यटन प्रवर्द्धन र व्यापारिक अवसरका विषयमा विस्तृत छलफल गर्ने कार्यक्रम तय भएको छ।

भ्रमणको दोस्रो दिन अर्थात् असार १ गते बिहान परराष्ट्रमन्त्री खनालले ‘चाइना एकेडेमी अफ साइन्स’ का प्रतिनिधिहरूसँग द्विपक्षीय भेटवार्ता गर्नेछन्। उक्त उच्चस्तरीय बैठकमा नेपाल र चीनबीच शिक्षा, विज्ञान, प्रविधि तथा नवप्रवर्तनका क्षेत्रमा गर्न सकिने नयाँ सहकार्य र प्राविधिक सहयोगका विषयमा गहन छलफल हुनेछ। असार १ गते दिउँसो र असार २ गते भने मन्त्री खनाल पूर्ण रूपमा राजनीतिक भेटघाटमा व्यस्त रहनेछन्।

उनले आफ्ना चिनियाँ समकक्षी वाङ यी र चिनियाँ कम्युनिस्ट पार्टी (सीपीसी) का विदेश विभाग प्रमुख लिउ हाइसिङ लगायतका उच्च राजनीतिक नेतृत्वसँग द्विपक्षीय हित र आपसी सम्बन्धका विविध पक्षमा वार्ता गर्नेछन्।

यस भ्रमणका क्रममा नेपालले केही महत्त्वपूर्ण र संवेदनशील भूराजनीतिक तथा आर्थिक एजेन्डाहरूलाई मुख्य रूपमा उठाउने तयारी गरेको छ। परराष्ट्र मन्त्रालय स्रोतका अनुसार हालैको भारत भ्रमणका क्रममा मन्त्री खनालले लिपुलेक क्षेत्रबाट भारत र चीनले संयुक्त रूपमा खोलेको व्यापारिक मार्गको विषय उठाएका थिए।

उक्त त्रिदेशीय सीमा र व्यापारिक मार्गको विषयले यस पटकको चीन भ्रमणमा पनि प्राथमिकता पाउने निश्चित छ। यसका साथै नेपाल र चीनबिच विगतमा भएका सम्झौताहरूको कार्यन्वयन, सीमा नाकाहरूको स्तरोन्नति, बेल्ट एन्ड रोड इनिसिएटिभ (बीआरआई) अन्तर्गतका आयोजनाहरूको गति र दुई देशबीचको व्यापार घाटा न्यूनीकरणका उपायहरूबारे विस्तृत रूपमा संवाद हुनेछ।

नयाँ सरकार गठन भएपछि र रास्वपा नेता खनालले परराष्ट्र मन्त्रालयको कमान्ड सम्हालेपछि दुवै छिमेकी मुलुकहरूसँग सन्तुलित र परिणाममुखी कूटनीतिक सम्बन्ध स्थापित गर्ने सरकारको नीतिको रूपमा यो भ्रमणलाई लिइएको छ।

चीनमा रहेका नेपाली कूटनीतिज्ञहरूले मन्त्री खनालको यो भ्रमणले दुई देशबिचको परम्परागत मैत्रीपूर्ण सम्बन्धलाई थप उचाइमा पुर्‍याउने र शिक्षा, विज्ञान तथा पूर्वाधार विकासमा चिनियाँ सहयोगको दायरा फराकिलो बनाउन महत्त्वपूर्ण भूमिका खेल्ने विश्वास व्यक्त गरेका छन्।