देश जलाउने, भ्रष्टाचार र कुशासन चलाउने तथा दमन गर्ने शक्तिलाई जनताले पराजित गराउने छन -प्रचण्ड

रुकुम पूर्व। नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले प्रतिनिधि सभा निर्वाचनमा देश जलाउने, भ्रष्टाचार र कुशासन चलाउने तथा दमन गर्ने शक्तिलाई जनताले पराजित गर्ने बताएका छन्। रुकुम पूर्वको चुनबाङमा शनिबार अपराह्न आयोजित जनभेटघाट तथा अन्तरक्रिया कार्यक्रमलाई सम्बोधन गर्दै उनले बङ्गलादेशमा हालै सम्पन्न निर्वाचन परिणाबारे टिप्पणी समेत गरे।

‘सिंहदरबार, संसद् भवन जले। सर्वोच्च अदालत जल्यो। निजी सम्पत्ति जले, व्यक्तिका घर जले। अब आगो लगाउने र ध्वंस मच्चाउनेहरू हार्नेछन्,’ उनले भने, ‘गणतन्त्र र परिवर्तन ल्याउनेहरू जित्नेछन्।’

उनले बङ्गलादेशको निर्वाचनबाट सिक्नुपर्ने आवश्यकता औंल्याए। बङ्गलादेशमा पनि आगो लगाइयो। चुनावमा आगो लगाउनेहरू नै जित्छन् भनिन्थ्यो, तर उनीहरू हारे। नजलाउने र स्थिरता चाहनेहरू जिते,’ उनले भनेर्, सामाजिक सञ्जालमा ७५ लाख फलोअर्स भएका भनिएका व्यक्तिहरू तेस्रो भए। यहाँ पनि हल्लाखोरहरूको हिसाब जनताले गरेर बसेका छन्।’

संयोजक प्रचण्डले आगजनी, कुशासन, दमन र हिंसा मच्चाउनेहरूलाई रोल्पा–रुकुमका जनताले राम्ररी बुझेको बताए र्। तपाईंहरूले बुझ्नुभएको छ, अब देशभरिका जनताले पनि बुझ्नेछन्,’ उनले भने।

उनले रुकुम पूर्वलाई विकासको नयाँ मोडेलका रूपमा स्थापित गर्ने प्रतिबद्धता व्यक्त गरे र्। भरतपुर मोडेल तपाईंहरूले देख्नुभएकै छ। अब विकासको नयाँ मोडेल र समाजवादको नयाँ मोडेल विकास गर्नेछौँ,’ संयोजक प्रचण्डले भने। 

सशस्त्र सङ्घर्षका सुप्रिम कमान्डर प्रचण्ड आफ्नो पुरानो आश्रयस्थल चुनवाङ पुग्दा भावविह्वल भए । उनी र पत्नी सीता दाहाल बसेको कोठा, छोरा प्रकाश दाहाल लगायत सहयोद्धाहरू बसेका घर अवलोकन गरे । अहिले सीता र प्रकाश दुवै नहुँदा प्रचण्डले आँसु रोक्न सकेनन् ।

केहीबेर गीत गुनगुनाउँदै उनले भने, ‘नेपाली क्रान्तिमा उहाँहरूको योगदान र यो भूमिको महत्त्व मेरो जीवनमा सधैँ अमिट छ ।’ प्रचण्ड फागुन २१ गते हुने प्रतिनिधिसभा निर्वाचनमा रुकुम पूर्वबाट उम्मेदवार छन् । 

मतदाता भेटघाटका क्रममा उनले रुकुमलाई ‘क्रान्तिको जननी र शान्तिको आधारभूमि’ भएको बताएका छन् ।  चुनवाङ बैठकले जनयुद्धलाई शान्तिपूर्ण बाटोमा डोर्‍याएको र जिल्लाले नेपालको आमूल परिवर्तनमा गौरवशाली इतिहास रचेको प्रचण्डले बताए । तीन दिनदेखि जिल्लामा रहेका प्रचण्ड शनिवार चुनवाङको गैरीगाउँ र पुथा उत्तरगंगा गाउँपालिकाको तकसेरा पुग्ने कार्यक्रम छ ।