फिफा विश्वकप २०२६ -दक्षिण कोरियाको शानदार जित

काठमाडौं। फिफा विश्वकप २०२६ अन्तर्गत समूह ‘ए’ को निकै रोमान्चक र प्रतिस्पर्धात्मक खेलमा दक्षिण कोरियाले उत्कृष्ट पुनरागमन गर्दै चेक रिपब्लिकमाथि २–१ गोलको शानदार जित दर्ता गरेको छ। मेक्सिकोको प्रसिद्ध ग्वाडालाजारा रंगशालामा सम्पन्न खेलमा दक्षिण कोरियाले उत्कृष्ट खेल प्रदर्शन गर्दै महत्त्वपूर्ण ३ अंक बटुल्न सफल भयो। खेलको पहिलो हाफ प्रतिस्पर्धात्मक रहे पनि दुवै टोलीले गोल गर्न सकेका थिएनन्। दोस्रो हाफमा आक्रामक रूपमा उत्रिएको चेक रिपब्लिकले सुरुवाती अग्रता लियो।

खेलको ५८औँ मिनेटमा लादिस्लाभ क्रेज्सीले उत्कृष्ट गोल गर्दै चेक रिपब्लिकलाई १–० को सुरुवाती अग्रता दिलाए। एक गोलले पछि परेको स्थितिमा पनि दक्षिण कोरियाले आफ्नो धैर्यता गुमाएन। खेलको ६६औँ मिनेटमा हवाङ इन–बमले उत्कृष्ट गोल गर्दै खेललाई १–१ को बराबरीमा ल्याए।  बराबरीपछि झन् आक्रामक बनेको दक्षिण कोरियाका लागि ७९औँ मिनेटमा ओ ह्युन–ग्युले गोल गर्दै टोलीलाई २–१ को अग्रता दिलाए। खेलको अन्तिम समयसम्म दुवैतर्फबाट थप गोल हुन नसक्दा ओ ह्युन–ग्युको त्यही गोल नै खेलको निर्णायक सावित भयो।

लामो समय (२० वर्ष) को अन्तरालपछि विश्वकपमा फर्किएको चेक रिपब्लिकले खेलभरि नै दक्षिण कोरियालाई कडा चुनौती दिएको थियो। यद्यपि, दक्षिण कोरियाको चुस्त रक्षापंक्ति र उत्कृष्ट आक्रामक रणनीतिका सामु चेक रिपब्लिकको केही चलेन। यो महत्वपूर्ण जितसँगै दक्षिण कोरियाले फिफा विश्वकप २०२६ को समूह चरणमा आफ्नो बलियो उपस्थिति र बलियो सम्भावना पेश गरेको छ।