मध्यरातमा १९ बुँदे सहमति: वीर अस्पतालको आईसीयूबाटै नर्स ज्योति रानाभाटको अनसन अन्त्य

काठमाडौँ । विभिन्न माग राख्दै विगत साउन १४ गतेदेखि आमरण अनसनमा बसेकी नर्स अभियन्ता ज्योति रानाभाट र सरकारबीच १९ बुँदे सहमति भएको छ । स्वास्थ्य तथा जनसंख्या मन्त्रालयको वार्ता टोली र रानाभाट पक्षबीच गएराति अबेर (बुधबार बिहान २:३५ बजे) सहमति जुटेसँगै उनले आफ्नो एक साता लामो अनसन अन्त्य गरेकी हुन् ।

वीर अस्पतालको आईसीयू वार्डमा उपचाररत रानाभाटको स्वास्थ्य अवस्था जटिल बन्दै गएपछि सरकारी टोली र आन्दोलनरत पक्षबीच घनीभूत छलफल भई सहमति पत्रमा हस्ताक्षर भएको हो । सहमति पत्रमा मन्त्रालयका तर्फबाट अतिरिक्त सचिव डा. श्रीकृष्ण श्रेष्ठ, वरिष्ठ मेडिकल सुपरिटेन्डेन्ट डा. हेमन्त चन्द्र ओझा र कानुन अधिकृत जयप्रसाद सुवेदी तथा अभियन्ता रानाभाटले हस्ताक्षर गरेका छन् । 

सहमति अनुसार, सरकारी र निजी अस्पतालका नर्स तथा स्वास्थ्यकर्मीको सेवा-सुविधा र कार्यभार निर्धारणका लागि ७ दिनभित्र उच्चस्तरीय कार्यदल गठन गरिनेछ, जसले ६ महिनाभित्र प्रतिवेदन पेश गर्नेछ ।

१९ बुँदे सहमतिका मुख्य बुँदाहरू:

• जोखिम भत्ता: नर्सिङ क्षेत्रका लागि कम्तीमा २५% जोखिम भत्ता सुनिश्चित गर्ने ।
• दरबन्दी र स्थायीत्व: नर्स-बिरामी अनुपात मिलाई नयाँ दरबन्दी सिर्जना गर्ने र करारका स्वास्थ्यकर्मीलाई स्थायी प्रक्रियामा लैजाने ।
• नर्सिङ ऐन: 'नर्सिङ एन्ड मिडवाइफरी सेवा ऐन' तर्जुमा गर्ने ।
• गुणस्तर: अस्पतालहरूमा न्यूनतम सेवा मापदण्ड (MSS) अनिवार्य गर्ने ।
• विशेषज्ञ पद: स्पेशलिस्ट नर्स र एडभान्स प्राक्टिस नर्स (APN) पदहरूका लागि कार्यदल गठन । 
  

नर्सिङ क्षेत्रमा व्याप्त श्रम शोषण, न्यून तलब, र लाइसेन्स परीक्षाको व्यवस्थापन लगायत १५ बुँदे माग राखी रानाभाटले अनसन सुरु गरेकी थिइन् । स्वास्थ्य अवस्था गम्भीर भएपछि वीर अस्पतालमा उपचार गराइरहेकी उनले सहमतिसँगै अनसन फिर्ता लिएकी हुन् । सरोकारवालाहरूले यस सहमतिलाई ऐतिहासिक भन्दै कार्यान्वयनको माग गरेका छन् ।