बिम्स्टेकको छैटौँ शिखर सम्मेलन सुरु, प्रधानमन्त्री ओली र भारतीय प्रधानमन्त्री मोदीबीच दुईपक्षीय भेटवार्ता हुने

काठमाडौं । बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास बिम्स्टेकको छैटौँ शिखर सम्मेलन सुरु भएको छ ।

थाइल्यान्डको राजधानी बैङ्ककस्थित होटल साड्ग्रिलामा सदस्य मुलुकका सरकार प्रमुखहरुको सामुहिक फोटोसेसन र कार्यसूची टेबल गरिएसँगै बिम्स्टेक सम्मेलन सुरु भएको हो ।

सदस्य मुलुकका प्रतिनिधिमण्डलका नेताहरुलाई आयोजक राष्ट्र थाइल्याण्डका प्रधानमन्त्री पे थोङ् थान् शिनावातले स्वागत गरेको थियो । सम्मेलनमा आज प्रधानमन्त्री केपी शर्मा ओलीसहित सदस्य मुलुकका सरकार प्रमुखहरुले सम्बोधन गर्ने कार्यक्रम रहेको छ ।

शिखर सम्मेलनमा ‘बिम्स्टेक म्यारिटाइम ट्रान्सपोर्ट कोअपरेसन’ मा हस्ताक्षरपछि सदस्य मुलुकहरु थाइल्यान्ड, बङ्गलादेश, भूटान, भारत, म्यान्मार, नेपाल र श्रीलङ्काका प्रधानमन्त्री (प्रतिनिधिमण्डलका नेता) हरुले सम्बोधन गर्नेछन् ।

सम्बोधनपछि कार्यसूचीहरू पारित हुनेछन् भने आयोजक मुलुककी प्रधानमन्त्री शिनावात्राले पत्रकार सम्मेलन गर्ने कार्यक्रम छ ।

सम्मेलनमा दिवाभोजपछि स्थानीय समयअनुसार अपराह्न ४ बजे प्रधानमन्त्री ओली र भारतीय प्रधानमन्त्री नरेन्द्र मोदीबीच दुईपक्षीय भेटवार्ता हुनेछ ।

बिमस्टेक सम्मेलन सकिएपछि प्रधानमन्त्री ओली आज साँझ थाइल्यान्डस्थित नेपाली दूतावासले आयोजना गर्ने स्वागत समारोहमा सहभागी हुनेछन् ।

प्रधानमन्त्री ओलीको भ्रमण दलमा प्रथम महिला राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक विकास सल्लाहकार डा. युवराज खतिवडा, मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राईलगायत छन् । यही चैत १९ गते बैङ्कक गएका प्रधानमन्त्री ओली चैत २३ गते स्वदेश फर्कने कार्यक्रम रहेको छ ।

यसअघि बिहीबार प्रधानमन्त्री ओलीसहित सदस्य मुलुकका सरकार प्रमुखलाई आयोजक मुलुक थाइल्यान्डकी प्रधानमन्त्री शिनावात्राले रातिभोजको आयोजना गरेकी थिइन् । सो समारोहमा प्रधानमन्त्री ओली र भारतका समकक्षी मोदी सँगसँगै देखिएका थिए ।