रोयल च्यालेन्जर्स बैंग्लोर बिरुद्ध गुजरात टाइटन्सको शानदार जित

काठमाडौं ।  मोहम्मद सिराजको घातक बलिङपछि साई सुदर्शन र जोस बटलरको विस्फोटक ब्याटिङको मद्दतले गुजरात टाइटन्सले रोयल च्यालेन्जर्स बैंग्लोर (आरसीबी) लाई ८ विकेटले पराजित गरेको छ। एम चिन्नास्वामी स्टेडियममा बुधबार राति सम्पन्न खेलमा टस हारेर पहिला ब्याटिङ गरेको आरसीबीले २० ओभरमा ८ विकेट गुमाएर १६९ रन बनायो। जवाफमा गुजरातले १७.५ ओभरमा २ विकेट गुमाउँदै १७० रन बनाएर सहज जित हात पार्‍यो।

गुजरातको यो लगातार दोस्रो जित हो भने आरसीबीले लगातार दुई जितपछि पहिलो हार व्यहोर्नुपर्‍यो। यो हारपछि रजत पाटीदार नेतृत्वको आरसीबी अंक तालिकाको शीर्ष स्थानबाट तेस्रो स्थानमा खस्किएको छ। आरसीबीको नेट रनरेट १.१४९ रहेको छ।

उता, गुजरात चौथो स्थानमा ४ अंक र ०.८०७ नेट रनरेटसहित उक्लिएको छ। पहिलो स्थानमा ४ अंक र १.४८५ नेट रनरेटसहित पञ्जाब किंग्स रहेको छ। १७० रनको लक्ष्य पछ्याउन ओर्लिएको गुजरातलाई साई सुदर्शन र शुभमन गिलले मध्यम सुरुवात दिलाए। दुवैले पहिलो विकेटका लागि ३२ रनको साझेदारी गरे। पाँचौं ओभरमा लियाम लिभिङस्टोनले शुभमन गिललाई १४ रनमा पेभेलियन पठाए।

त्यसपछि जोस बटलर मैदानमा उत्रिए र सुदर्शनसँग मिलेर दोस्रो विकेटका लागि ४७ बलमा ७५ रनको आक्रामक साझेदारी गरे। सुदर्शन ३६ बलमा ७ चौका र १ छक्कासहित ४९ रन बनाएर आउट भए। चौथो नम्बरमा आएका शेर्फेन रदरफोर्डले बटलरसँग ६३ रनको अविजित साझेदारी गर्दै टोलीलाई जित दिलाए।

बटलर ७३ रनमा नटआउट रहे भने रदरफोर्डले ३० रन बनाए। आरसीबीका लागि भुवनेश्वर कुमार र जोस हेजलवुडले एक-एक विकेट लिए।पहिले ब्याटिङ गरेको आरसीबीको ब्याटिङ क्रम गुजरातका बलरहरू सामु निरश देखिए। लियाम लिभिङस्टोनले सर्वाधिक ५४ रन बनाए भने जितेश शर्माले ३३ रन र टिम डेभिडले ३२ रनको योगदान दिए।

कप्तान रजत पाटीदार ४ रनमै आउट भए। विराट कोहली ७, फिल साल्ट १४, देवदत्त पडिक्कल ४, र क्रुणाल पाण्ड्या ५ रनमै सीमित भए। गुजरातका लागि मोहम्मद सिराजले ३ विकेट लिए भने साई किशोरले २ विकेट झारे। अरशद खान, प्रसिद्ध कृष्णा र ईशान्त शर्माले एक-एक विकेट लिए।